قوم اور سرزمین کے دفاع میں کوئی سمجھوتہ نہیں ہوگا:شہباز شریف

?️ 12 اکتوبر 2025

قوم اور سرزمین کے دفاع میں کوئی سمجھوتہ نہیں ہوگاؔ:شہباز شریف

پاکستان کے وزیرِاعظم شہباز شریف نے کہا ہے کہ ملک کے دفاع اور عوام کے تحفظ کے لیے کسی بھی لمحے ہچکچاہٹ کا مظاہرہ نہیں کیا جائے گا۔ انہوں نے یہ بیان پاکستان اور افغان طالبان کے درمیان سرحدی کشیدگی میں اضافے کے تناظر میں دیا۔

اتوار کو جاری اپنے پیغام میں وزیرِاعظم شہباز شریف نے پاک فوج کی جانب سے طالبان کے حملوں کا منہ توڑ جواب دینے اور افغان چوکیوں کو نشانہ بنانے پر فورسز کی تعریف کی۔

انہوں نے کہا کہ پاکستان کے دفاع میں کوئی کمی یا کوتاہی برداشت نہیں کی جائے گی، اور کسی بھی اشتعال انگیز کارروائی کا بھرپور اور مؤثر جواب دیا جائے گا۔

شہباز شریف نے افغان عبوری حکومت پر الزامات عائد کرتے ہوئے کہا کہ پاکستان نے دہشت گرد گروہوں کے خلاف فوری اور نتیجہ خیز کارروائیوں کا فیصلہ کیا ہے۔

صدرِ پاکستان آصف علی زرداری نے بھی اپنے علیحدہ بیان میں افغان عبوری حکومت کے حالیہ مؤقف پر افسوس کا اظہار کرتے ہوئے طالبان پر زور دیا کہ وہ دہشت گردی کے خلاف مشترکہ اقدامات کے لیے تعاون کریں تاکہ خطے میں امن و استحکام قائم کیا جا سکے۔

ذرائع کے مطابق، پاک-افغان سرحد پر جھڑپوں کے بعد پاکستان نے دو اہم اور مصروف ترین سرحدی گزرگاہیں  طورخم اور چمن  عارضی طور پر بند کر دی ہیں، جس سے تجارتی سرگرمیاں اور عوامی آمد و رفت مکمل طور پر معطل ہو گئی ہیں۔

پاکستانی حکام کا کہنا ہے کہ گذشتہ شب طالبان کے حملوں کے جواب میں کی گئی جوابی کارروائی میں متعدد طالبان جنگجو اور سرحدی اہلکار ہلاک ہوئے۔

دوسری جانب، بعض اطلاعات کے مطابق جھڑپوں میں پاکستان کے دو فوجی، ایک عام شہری جاں بحق اور چند دیگر زخمی ہوئے ہیں۔