جنوبی افریقہ نے فلسطینی پاسپورٹ رکھنے والوں ویزا فری داخلہ عارضی طور پر روک دیا

?️ 7 دسمبر 2025

جنوبی افریقہ نے فلسطینی پاسپورٹ رکھنے والوں ویزا فری داخلہ عارضی طور پر روک دیا

جنوبی افریقہ کی حکومت نے اعلان کیا ہے کہ فلسطینی پاسپورٹ رکھنے والوں کے لیے 90 روزہ ویزا فری داخلے کی سہولت عارضی طور پر معطل کر دی گئی ہے۔ یہ فیصلہ اس وقت کیا گیا جب تحقیقات میں یہ بات سامنے آئی کہ اسرائیل سے وابستہ بعض عناصر اس سہولت کا غلط استعمال کر کے غزہ کے فلسطینیوں کو جنوبی افریقہ منتقل کرنے کی کوشش کر رہے تھے۔

وزارتِ داخلہ کے مطابق حالیہ دنوں میں چارٹرڈ پروازوں کے ذریعے کچھ فلسطینیوں کو اس مقصد کے تحت لایا گیا کہ وہ بطور سیاح یا مختصر قیام کے لیے نہیں بلکہ مستقل طور پر غزہ سے منتقل ہو جائیں۔ رپورٹ میں بتایا گیا کہ چند ثالثوں نے پورے چارٹرڈ طیارے کرائے پر لے کر فلسطینی خاندانوں کو یک طرفہ ٹکٹس پر جنوبی افریقہ پہنچایا۔

میڈیا رپورٹس کے مطابق گزشتہ ماہ جوہانسبرگ کے “تامبو” ایئرپورٹ پر تقریباً 160 فلسطینی بارہ گھنٹے تک رکے رہے اور بعد میں انہیں ملک میں داخلے کی اجازت دی گئی۔ بعد ازاں ایک اسرائیلی اخبار نے انکشاف کیا کہ ایک مشکوک تنظیم، جو ایک اسرائیلی-اسٹونین شہری چلا رہا تھا، ان پروازوں کے پیچھے تھی اور اس نے مزید ایسی پروازیں بھی منظم کی تھیں۔

الجزیرہ کی رپورٹ کے مطابق اسرائیلی حکام نے بھی ان خفیہ منتقلیوں میں قریبی ہم آہنگی کی تھی۔ رپورٹ میں یہ بھی بتایا گیا کہ “المجد یورپ” نامی تنظیم اس پورے عمل کی منتظم تھی، جو انسانی ہمدردی کی آڑ میں ممکنہ طور پر انسانی اسمگلنگ جیسے اقدامات میں ملوث تھی۔

اسرائیلی میڈیا کے مطابق اس تنظیم نے فلسطینیوں کو تقریباً دو ہزار امریکی ڈالر کی پیشکش کی اور ان کے لیے جنوبی افریقہ، انڈونیشیا اور ملائیشیا جیسے ممالک کے ٹکٹس بک کروائے۔ بتایا جاتا ہے کہ اس تنظیم کا اصل سرپرست تومر گونار لیند نامی شخص ہے جو اسرائیلی اور اسٹونین شہریت رکھتا ہے۔

جنوبی افریقہ کی حکومت کا کہنا ہے کہ اس پابندی کا مقصد فلسطینیوں کی غیر قانونی منتقلی اور ممکنہ استحصال کو روکنا ہے۔