تارکین وطن ایک بار پھر پانی کی نظر

12 اپریل 2022

سچ خبریں:تیونس کے پانیوں میں تارکین وطن کی دو کشتیاں ڈوب جانے سے13افراد ہلاک ہو گئے۔
شمالی افریقی ملک تیونس کے ساحلوں کے قریب یورپ کی طرف سفر کرنے والے افریقی تارکین وطن کی دو کشتیاں سمندر میں ڈوب جانے سے تیرہ افراد ہلاک ہو گئے،ہلاک ہونے والوں میں چھ خواتین اور چھ بچے بھی شامل ہیں جبکہ تمام تیرہ ہلاک شدگان زیریں صحارا کے مختلف افریقی ممالک کے شہری تھے۔

تیونس میں حکام نے بتایا کہ یہ تارکین وطن پناہ کی تلاش میں دو کشتیوں میں سوار ہو کر اٹلی کی طرف جا رہے تھے، یاد رہے کہ تیونس اور لیبیا وہ دو شمالی افریقی ملک ہیں جہاں سے تارکین وطن سب سے بڑی تعداد میں یورپ کی طرف ایسا غیر قانونی اور انتہائی خطرناک سمندری سفر شروع کرتے ہیں جس کے بارے میں انہیں معلوم نہیں ہوتا کہ وہ یہ سفر پورا بھی کر سکیں گے یا نہیں جبکہ آئے دن تارکین وطن کو لے جانے والی کشتیوں کے ڈوبنے کی خبریں منظر عام پر آتی رہتی ہیں۔

یاد رہے کہ گزشتہ سال یورپ پہنچنے کی کوشش میں تقریباﹰ تیرہ سو تارکین وطن بحیرہ روم میں ڈوب کر ہلاک ہو گئے تھے جس کے بعد اس بحیرہ کو تارکین وطنوں کے لیے موت کا کنواں کہا جاتا ہے۔