بھارت روس سے تیل نہیں خریدے گا:ٹرمپ

بھارت روس سے تیل نہیں خریدے گا:ٹرمپ

 امریکی صدر ڈونلڈ ٹرمپ نے دعویٰ کیا ہے کہ بھارتی وزیرِاعظم نریندر مودی نے روس سے تیل کی خریداری بند کرنے اور اس کے بدلے امریکا اور ممکنہ طور پر وینزویلا سے زیادہ تیل خریدنے پر رضامندی ظاہر کی ہے۔

امریکی صدر نے پیر کے روز اپنے سوشل میڈیا پلیٹ فارم “ٹروتھ سوشل” پر ایک بیان میں کہا کہ نریندر مودی سے ان کی گفتگو ان کے لیے باعثِ اعزاز تھی۔ ٹرمپ کے مطابق، مودی ان کے قریبی دوست اور ایک مضبوط و باوقار رہنما ہیں۔

ٹرمپ نے بتایا کہ دونوں رہنماؤں کے درمیان تجارت، توانائی اور روس-یوکرین جنگ کے خاتمے سمیت متعدد اہم امور پر تفصیلی بات چیت ہوئی۔ ان کے بقول، بھارتی وزیرِاعظم نے روسی تیل کی خریداری روکنے اور امریکا سے زیادہ توانائی خریدنے پر اتفاق کیا، جس سے یوکرین میں جاری جنگ کے خاتمے میں مدد مل سکتی ہے، جہاں ہر ہفتے ہزاروں افراد ہلاک ہو رہے ہیں۔

امریکی صدر نے مزید اعلان کیا کہ دوطرفہ تعلقات کے پیشِ نظر امریکا اور بھارت کے درمیان ایک نیا تجارتی معاہدہ طے پا گیا ہے، جس کے تحت امریکا بھارت پر عائد جوابی ٹیرف کو 25 فیصد سے کم کر کے 18 فیصد کر دے گا۔

ٹرمپ کے مطابق، بھارت بھی امریکا کے خلاف تمام ٹیرف اور غیر ٹیرف رکاوٹیں ختم کر دے گا۔ اس کے علاوہ بھارتی وزیرِاعظم نے توانائی، ٹیکنالوجی، زراعت، کوئلہ اور دیگر شعبوں میں 500 ارب ڈالر سے زائد کی امریکی مصنوعات خریدنے کا وعدہ کیا ہے۔

امریکی صدر کا کہنا تھا کہ امریکا اور بھارت کے تعلقات آئندہ دنوں میں مزید مضبوط ہوں گے اور دونوں ممالک کی قیادت عملی نتائج حاصل کرنے کی صلاحیت رکھتی ہے۔

ٹرمپ نے اس سے قبل بھی اعلان کیا تھا کہ بھارت کے ساتھ وینزویلا سے تیل کی خریداری پر اتفاق ہو چکا ہے، جبکہ چین کو بھی اسی نوعیت کے معاہدے میں شامل ہونے کی ترغیب دی گئی ہے۔

واضح رہے کہ مارچ 2025 میں امریکا نے روس اور وینزویلا سے تیل خریدنے والے ممالک، جن میں بھارت بھی شامل تھا، پر 25 فیصد ٹیرف عائد کیا تھا۔ واشنگٹن کا مقصد روس کی تیل سے حاصل ہونے والی آمدنی میں کمی اور وینزویلا کی تیل کی صنعت پر کنٹرول حاصل کرنا بتایا جاتا ہے۔

ٹرمپ اس سے قبل یہ دعویٰ بھی کر چکے ہیں کہ اگر توانائی کی قیمتیں کم ہو جائیں تو روسی صدر ولادیمیر پوتن یوکرین میں جاری جنگ روکنے پر مجبور ہو سکتے ہیں۔