بھارت اور اسرائیل کے دفاعی تعاون پر پاکستان کا انتباہ

بھارت اور اسرائیل کے دفاعی تعاون پر پاکستان کا انتباہ،

پاکستان نے بھارت اور اسرائیل کے درمیان بڑھتے ہوئے دفاعی تعاون پر تشویش کا اظہار کرتے ہوئے اسے اپنی سلامتی کے لیے خطرہ قرار دیا ہے اور کہا ہے کہ وہ اس کے ممکنہ نتائج سے نمٹنے کے لیے مکمل طور پر تیار ہے۔

پاکستانی وزارتِ خارجہ کے ترجمان طاہر اندرابی نے اسلام آباد میں ہفتہ وار بریفنگ کے دوران بھارت کے وزیر اعظم نریندر مودی کے مقبوضہ علاقوں کے دورے پر ردعمل دیا۔

انہوں نے کہا کہ پاکستان، مودی کے تل ابیب دورے اور اسرائیل کے ساتھ دفاعی تعاون بڑھانے کی کوششوں سے آگاہ ہے اور صورتحال پر گہری نظر رکھے ہوئے ہے۔ ترجمان نے اسرائیلی وزیر اعظم بنیامین نتانیاهو کے حالیہ بیانات پر تنقید کرتے ہوئے کہا کہ پاکستان دیگر اسلامی ممالک کے ساتھ مل کر مقبوضہ کرانۂ باختری پر اسرائیلی تسلط اور توسیع پسندانہ پالیسیوں کی مذمت کرتا ہے۔

طاہر اندرابی کا کہنا تھا کہ بھارت اور اسرائیل کے درمیان دفاعی معاہدے خطے کے امن کے لیے خطرہ بن سکتے ہیں، خصوصاً اگر پاکستان کے خلاف کسی جارحیت میں اسرائیل کا کردار سامنے آتا ہے۔ انہوں نے کہا کہ پاکستان ہر ممکن صورتحال کا مقابلہ کرنے کے لیے تیار ہے۔

انہوں نے غزہ میں ممکنہ بین الاقوامی استحکام فورس میں پاکستان کے کردار سے متعلق سوال پر کہا کہ اسلام آباد نے تاحال اس بارے میں کوئی فیصلہ نہیں کیا۔

رپورٹس کے مطابق، مودی کے دورے کے دوران متعدد سکیورٹی اور دفاعی معاہدوں پر دستخط متوقع ہیں۔ بعض بھارتی میڈیا اداروں نے دعویٰ کیا ہے کہ نئی دہلی اسرائیلی دفاعی نظام، جدید ڈرونز، طویل فاصلے تک مار کرنے والے میزائل اور جدید دفاعی ٹیکنالوجی کے حصول میں دلچسپی رکھتا ہے۔

دوسری جانب بھارت کی اپوزیشن جماعت کانگریس نے حکومت کی پالیسیوں پر تنقید کرتے ہوئے کہا ہے کہ نئی دہلی ایک طرف فلسطین کی حمایت کا دعویٰ کرتا ہے جبکہ دوسری طرف اسرائیل کے ساتھ غیر معمولی قربت اختیار کر رہا ہے، جس پر ملک کے اندر بھی بحث جاری ہے۔