بائیڈن کے قومی سلامتی کے مشیر کی اسرائیلی آرمی چیف سے ملاقات

24 جون 2021

سچ خبریں:وائٹ ہاؤس نے اعلان کیا کہ امریکی قومی سلامتی کے مشیر نے واشنگٹن میں اسرائیلی فوج کے چیف آف جنرل اسٹاف آویوکوخاوی سے سکیورٹی امور پر تبادلہ خیال کیا ہے۔
اسپوٹنک نیوز ایجنسی کی رپورٹ کے مطابق بدھ کے روز وائٹ ہاؤس کی طرف سے جاری ہونے والے ایک بیان میں امریکی قومی سلامتی کے مشیر جیک سلیوان کے حوالے سےکہا گیا ہے کہ ان کے اور ایوکوخاوی کے درمیان ملاقات ہوئی، سلیوان نےامریکی صدر بائیڈن کی اسرائیل کی سلامتی اور دونوں فریقوں کے مابین دفاعی شراکت داری کو مستحکم کرنے کے لئے جاری عزم کا اعادہ کیا۔

واضح رہے کہ ملاقات کے دوران عہدیداروں نے مشرق وسطی خصوصا ایران میں سلامتی کی صورتحال اور استحکام پر بھی تبادلہ خیال کیا،امریکی قومی سلامتی کے مشیر اور اسرائیلی فوج کے چیف آف جنرل اسٹاف نے علاقائی اسٹریٹجک چیلنجوں پر دو طرفہ مشاورت جاری رکھنے اور ان کا مقابلہ کرنے کے لیےتیاری کرنے کی ضرورت پر بھی اتفاق کیا۔

یادرہے کہ اسرائیلی وزیر خارجہ اگلے اتوار کو روم میں اپنے امریکی ہم منصب سے ملاقات کریں گے،عبرانی میڈیا نے اطلاع دی ہے کہ اسرائیلی وزیر خارجہ یائر لاپڈ اگلے اتوار کو اپنے امریکی ہم منصب انتھونی بلنکن سے ملاقات کریں گے،عبرانی سائٹ واللا کی خبر کے مطابق، رواں ماہ کی تیرہ تاریخ کو وزیر خارجہ کا عہدہ سنبھالنے کے بعد لاپڈ کا یہ پہلا سفر ہے۔

یادرہے کہ قبل ازیں بلنکن اور لاپڈ نے اپنی پہلی ٹیلی فون کال میں فلسطین میں تنازعہ کے خاتمے کی اہمیت ، تل ابیب کے ساتھ سفارتی تعلقات کو معمول پر لانے اور فروغ دینے کے مواقع ، ایران کے مسئلہ اور اسرائیلی سلامتی کو لازمی دیگر علاقائی مسائل میں امریکی حمایت اورتعاون کے بارے میں تبادلہ خیال کیا، دونوں فریقوں نے امریکہ اور صیہونی حکومت کے مابین وسیع پیمانہ پر شراکت پر بھی زور دیا۔