امریکی دباؤ کے باوجود ایران اپنے جوہری مؤقف سے پیچھے نہیں ہٹے گا:برطانوی میڈیا

امریکی دباؤ کے باوجود ایران اپنے جوہری مؤقف سے پیچھے نہیں ہٹے گا:برطانوی میڈیا

برطانوی اخبار ڈیلی میل نے اعتراف کیا ہے کہ ایران، امریکہ کی جانب سے بڑھتے ہوئے دباؤ کے باوجود اپنے جوہری پروگرام سے دستبردار ہونے کا کوئی ارادہ نہیں رکھتا۔

 ڈیلی میل نے اتوار کے روز شائع ہونے والی اپنی رپورٹ میں لکھا ہے کہ ایران نے واضح طور پر اعلان کیا ہے کہ حتیٰ کہ جنگ مسلط کیے جانے کی صورت میں بھی وہ اپنے جوہری پروگرام کو ترک نہیں کرے گا۔

رپورٹ کے مطابق، ایرانی وزیر خارجہ عباس عراقچی نے تہران میں ایک نشست کے دوران کہا کہ ایران نے اپنے پُرامن جوہری پروگرام کے لیے بھاری قیمت ادا کی ہے اور کسی کو یہ حق حاصل نہیں کہ وہ ایران کو یہ بتائے کہ اسے کیا کرنا چاہیے۔ انہوں نے زور دے کر کہا کہ اسلامی جمہوریہ ایران کی اصل طاقت بڑی طاقتوں کے دباؤ اور دھمکیوں کے سامنے ڈٹ جانے میں ہے۔

ڈیلی میل کے مطابق، ایرانی صدر مسعود پزشکیان نے بھی ان مذاکرات کو ’’مثبت پیش رفت‘‘ قرار دیتے ہوئے کہا کہ بات چیت ہمیشہ سے ایران کی حکمتِ عملی رہی ہے تاکہ مسائل کو پُرامن طریقے سے حل کیا جا سکے۔ انہوں نے واضح کیا کہ ایرانی قوم احترام کے ساتھ احترام کا جواب دیتی ہے، لیکن زور اور دھونس کی زبان کو قبول نہیں کرتی۔

اخبار نے مزید لکھا کہ ایران مسلسل اس بات پر زور دیتا رہا ہے کہ اس کا جوہری پروگرام مکمل طور پر پُرامن مقاصد کے لیے ہے، تاہم بعض مغربی ممالک اور بین الاقوامی ایٹمی توانائی ایجنسی یہ دعویٰ کرتے ہیں کہ ایران نے 2003 تک جوہری ہتھیار حاصل کرنے کے لیے ایک منظم فوجی پروگرام پر کام کیا تھا۔