امریکہ نے ہمیں بین الاقوامی ایٹمی توانائی ایجنسی کے اجلاس میں شریک نہیں ہونے دیا:روس

🗓️ 25 اکتوبر 2022

سچ خبریں:روس کی وزارت خارجہ نے بین الاقوامی ایٹمی توانائی ایجنسی کی کانفرنس میں روسی حکومت کے وفد کی شرکت کے لیے ویزے جاری نہ کرنے کے امریکی اقدام کی مذمت کی ہے۔

اسپوٹنک نیوز ایجسنی کی رپورٹ کے مطابق روسی وزارت خارجہ کی ترجمان ماریا زاخارووا نے کہا کہ واشنگٹن میں بین الاقوامی ایٹمی توانائی ایجنسی کی بین الاقوامی کانفرنس میں شرکت کے لیے روس کے وفد کو امریکہ کی جانب سے ویزا جاری نہ کیا جانا ماسکو کے لیے ناقابل قبول ہے۔

رپورٹ کے مطابق، "21ویں صدی میں جوہری توانائی” کے عنوان سے بین الاقوامی جوہری توانائی ایجنسی کی یہ کانفرنس وزارتی سطح پر 26-28 اکتوبر 2022 کو واشنگٹن میں منعقد ہونے والی ہے جس میں روسی سرکاری کمپنی(Rosatom) اور ٹیکنیکل مانیٹرنگ کمپنی (Rosteknadzor) کے نمائندوں پر مشتمل روسی وفد نے شرکت کا منصوبہ بنایا تھا۔

زاخارووا نے مزید کہا کہ امریکہ نے روسی نمائندوں کو ویزا جاری نہیں کیا جبکہ اس سلسلہ میں متعلقہ درخواستیں پہلے سے اور طے شدہ طریقہ کار کے مطابق جمع کرائی گئی تھیںانہوں نے کہا کہ اس طرح انٹرنیشنل اٹامک انرجی ایجنسی کے زیر اہتمام ایک اہم بین الاقوامی کانفرانس میں روس کی شرکت کو بالکل ناقابل قبول طریقے سے اور بغیر کسی وجہ کے روک دیا گیا۔

روس کی وزارت خارجہ کے ترجمان نے اس بات پر زور دیا کہ امریکہ کی طرف سے بین الاقوامی ایٹمی توانائی ایجنسی کی کانفرنس میں روسی وفد کو ویزے جاری کرنے سے انکار بین الاقوامی ایٹمی توانائی ایجنسی اور میزبان ملک کے درمیان معاہدے کے اصولوں کی کھلی خلاف ورزی ہے۔