امریکہ نے فوج اور جنگی بحری جہاز وینزویلا کے ساحل قریب کیوں  تعینات  کیے ہیں؟

امریکہ نے فوج اور جنگی بحری جہاز وینزویلا کے ساحل قریب کیوں  تعینات  کیے ہیں؟

امریکی میڈیا کے مطابق وائٹ ہاؤس نے اعلان کیا ہے کہ وینزویلا کے ساحل کے قریب جنگی بحری جہاز، آبدوزیں اور تقریباً چار ہزار فوجی تعینات کرنے کا مقصد منشیات کی اسمگلنگ کو روکنا ہے۔ تاہم اس فوجی موجودگی نے ماہرین میں یہ قیاس آرائیاں بڑھا دی ہیں کہ آیا صدر ڈونلڈ ٹرمپ وینزویلا کے صدر نکولاس مادورو کے خلاف کوئی جارحانہ اقدام کرنے جا رہے ہیں یا نہیں۔

بلومبرگ کے مطابق ٹرمپ نے حالیہ دنوں مادورو کو دہشتگرد قرار دیا اور اس کی گرفتاری پر 50 ملین ڈالر انعام رکھا۔ اپنی پہلی صدارتی مدت میں بھی وہ مادورو کی برطرفی کے خواہاں تھے۔ اب سوال یہ ہے کہ کیا وہ "لامتناہی جنگوں” سے امریکی دستبرداری کے وعدے کے باوجود مغربی نصف کرے میں نیا تنازع کھولنے جا رہے ہیں؟

تجزیہ کاروں کا کہنا ہے کہ موجودہ فوجی تعیناتی اس پیمانے کی نہیں ہے جیسی 1989 میں پاناما میں جنرل مانوئل نوریگا کی حکومت کے خاتمے کے وقت کی گئی تھی۔ اس سے یہ ظاہر ہوتا ہے کہ فی الحال براہ راست فوجی حملے کا امکان کم ہے۔

بعض ماہرین کے مطابق یہ اقدام زیادہ تر ٹرمپ کے اندرونی سیاسی حربوں سے مشابہ ہے، جیسا کہ انہوں نے غیر قانونی مہاجرین کو روکنے کے لیے فوج کو سرحد پر تعینات کیا تھا یا نیشنل گارڈ کو امریکی شہروں میں تعینات کیا تھا۔

الیوٹ آبرامز، جو ٹرمپ کی پہلی حکومت میں وینزویلا کے لیے خصوصی نمائندہ تھے، کا کہنا ہے کہ ٹرمپ فوری طور پر حملہ نہیں کریں گے، لیکن اگر مادورو نے پڑوسی ملک گویانا کے خلاف فوجی کارروائی کی تو صورت حال بدل سکتی ہے۔ حالیہ دنوں امریکی وزیر خارجہ مارکو روبیو نے گویانا کا دورہ کیا اور خبردار کیا کہ گویانا پر کسی بھی حملے یا وہاں تیل کی بڑی کمپنی ایکسون موبل کی سرگرمیوں میں رکاوٹ کے سنگین نتائج ہوں گے۔

سیاسی مبصرین کے مطابق اگرچہ امریکی دباؤ وینزویلا کی فوج کو مادورو کے خلاف قدم اٹھانے پر آمادہ کر سکتا ہے، لیکن مادورو اور ان کے پیشرو ہوگو شاویز پہلے ہی بغاوتوں کو کچلنے میں اپنی مہارت دکھا چکے ہیں۔اس کے باوجود، امریکی فوجی موجودگی مادورو کو حزب اختلاف کی رہنما ماریا کورینا ماچادو کی گرفتاری سے باز رکھ سکتی ہے۔