امریکہ نے فلسطینیوں کو انسانی ڈھال کے طور پر استعمال ہونے سے آگاہ کیا تھا: رویٹرز

سچ خبریں: خبر رساں ادارے رویٹرز نے تصدیق شدہ ذرائع کے حوالے سے بتایا ہے کہ امریکی خفیہ ایجنسیوں کو صہیونی حکام کی اس بات چیت کی معلومات حاصل تھیں جس میں غزہ پٹی میں فلسطینی شہریوں کو انسانی ڈھال کے طور پر استعمال کرنے پر بحث کی گئی تھی۔

اس رپورٹ کے مطابق، امریکہ نے گزشتہ سال صہیونی حکام سے ایسی معلومات جمع کی تھیں جس میں اس بات پر غور کیا جا رہا تھا کہ فلسطینی شہریوں کو غزہ کے سرنگوں میں کیسے بھیجا جائے، جن کے بارے میں اسرائیلیوں کا خیال تھا کہ وہ بارود سے بھری ہو سکتی ہیں۔

رویٹرز کا کہنا ہے کہ اس معاملے سے آگاہ دو سابق امریکی اہلکاروں نے یہ معلومات وائٹ ہاؤس کو فراہم کی تھیں اور سابق صدر جو بائیڈن کی حکومت کے آخری ہفتوں میں امریکی خفیہ ایجنسیوں نے ان کا تجزیہ کیا تھا۔

رپورٹ کے مطابق، بائیڈن انتظامیہ کے اہلکاروں نے ان خبری رپورٹس پر اپنی تشویش کا اظہار پہلے ہی کر دیا تھا جن میں بتایا گیا تھا کہ اسرائیلی فوجی غزہ میں خود کو بچانے کے لیے فلسطینیوں کو انسانی ڈھال کے طور پر استعمال کر رہے ہیں، اور اس سے قبل واشنگٹن کی جانب سے اس سلسلے میں مخصوص شواہد جمع کرنے کی کوئی رپورٹ سامنے نہیں آئی تھی۔

صہیونی ریاست کی فوج کی طرف سے شہریوں کو انسانی ڈھال کے طور پر استعمال کرنے سے متعلق معلومات ان چند معلومات میں سے ایک تھیں جو صدر بائیڈن کی حکومت کے آخری مراحل میں گردش کر رہی تھیں۔