امریکہ ایران سے مذاکرات کرے: برطانیہ

سچ خبریں:برطانوی وزیرخارجہ نے جمعہ کی شب امریکہ پر زور دیا ہے کہ وہ ایران کے ساتھ مذاکرات جاری رکھے اور فوجی کارروائی سے گریز کرے۔

الجزیرہ نیوز نیٹ ورک کی رپورٹ کے مطابق، برطانوی وزیرخارجہ ڈیوڈ لیمی نے اپنے امریکی ہم منصب مارکو روبیو سے ملاقات سے قبل کہا کہ ریاستہائے متحدہ کو ایران کے ساتھ مذاکرات کرنے چاہئیں اور اس ملک پر حملے سے گریز کرنا چاہیے۔

ادھر، ایرانی وزیرخارجہ سید عباس عراقچی نے این بی سی نیوز سے گفتگو میں واضح کیا کہ ایک نکتے پر میں زور دینا چاہتا ہوں؛ ایران کے ایٹمی پروگرام کا کوئی فوجی حل نہیں ہے۔ یہ پہلے بھی آزما لیا گیا ہے۔ ہماری تنصیبات پر بڑے پیمانے پر حملے کیے گئے، ہمارے سائنسدانوں کو شہید کیا گیا، لیکن وہ ہمارے ایٹمی پروگرام کو ختم نہیں کر سکے۔ کیوں؟ کیونکہ یہ پروگرام ہمارے اپنے ہاتھوں اور ہمارے سائنسدانوں نے تیار کیا ہے۔

انہوں نے مزید کہا کہ اگر کوئی ایران کے ایٹمی پروگرام کا حل تلاش کرنا چاہتا ہے اور اس بات کو یقینی بنانا چاہتا ہے کہ یہ پروگرام پُرامن رہے، تو واحد راستہ سفارتی حل ہے۔

غنی سازی کے معاملے پر عراقچی کا کہنا تھا کہ یہ قیاس آرائیاں درست نہیں ہیں۔ ہم اس وقت ایک دوسرے کے ساتھ کام کر رہے ہیں۔ ہم نے کوئی تعطل (معطلی) تجویز نہیں کیا ہے اور نہ ہی امریکی فریق نے ‘صفر غنی سازی’ کی درخواست کی ہے۔

امریکی حکومتوں کی ایران مخالف پالیسیوں کو دشمنانہ قرار دیتے ہوئے ان کا کہنا تھا کہ سب سے پہلے، ہم امریکی عوام کو اپنا دشمن نہیں سمجھتے۔ ہم ایران کے خلاف امریکی حکومت کی پالیسیوں کو دشمنانہ سمجھتے ہیں۔ جب یہ دشمنیاں ختم ہوں گی، تب شاید ہم کسی مختلف قسم کے تعلقات کے بارے میں سوچ سکتے ہیں۔