امریکا روس کی جنگی مشین کو کمزور کر سکتاہے:زیلنسکی

 امریکا روس کی جنگی مشین کو کمزور کر سکتاہے:زیلنسکی

 یوکرین کے صدر ولادیمیر زیلنسکی نے کہا ہے کہ امریکا کی جانب سے عائد کی جانے والی نئی پابندیاں روس کی جنگی صلاحیت کو کمزور کر سکتی ہیں، تاہم ان کے مطابق جب تک یوکرین کو امریکی طویل فاصلے تک مار کرنے والے میزائل نہیں ملتے، روس مذاکرات پر آمادہ نہیں ہوگا۔

امریکی ویب سائٹ اکسیوس کے مطابق، زیلنسکی نے حالیہ دنوں امریکی صدر ڈونلڈ ٹرمپ سے ملاقات کے دوران "ٹام ہاک” طرز کے میزائل فراہم کرنے کی درخواست کی تھی، لیکن ٹرمپ نے اس مطالبے سے اتفاق نہیں کیا۔

بعد ازاں، ٹرمپ کی ولادیمیر پوتن سے طے شدہ ملاقات منسوخ ہونے اور روس کے خلاف پہلی نئی پابندیاں عائد کیے جانے کے بعد، سفارتی حالات میں غیر متوقع تبدیلی دیکھنے میں آئی۔

زیلنسکی نے ایک 35 منٹ طویل انٹرویو میں کہا:پابندیاں اثر دکھائیں گی، لیکن جب تک پوتن کو روکا نہیں جاتا، ہمیں مزید مؤثر ہتھیاروں کی ضرورت ہے۔ پابندیاں ایک طریقہ ہیں، مگر ہمیں طویل فاصلے تک مار کرنے والے میزائل بھی چاہییں۔

انہوں نے کہا کہ صدر ٹرمپ تنازع میں شدت آنے سے پریشان ہیں، لیکن اگر مذاکرات نہ ہوئے تو جنگ خود بخود شدت اختیار کر جائے گی۔

زیلنسکی نے تصدیق کی کہ ان کی ٹرمپ کے ساتھ بات چیت میں روس پر دباؤ بڑھانے اور ممکنہ طور پر  محاذوں کو منجمد کرنے جیسے اقدامات پر اصولی اتفاق ہوا ہے تاکہ مذاکرات کی راہ ہموار کی جا سکے۔

ان کے مطابق، روس نے نئی امریکی پابندیوں پر سخت ردعمل دیا ہے، اور روسی حکام کے بیانات کے ساتھ ساتھ سرکاری میڈیا میں امریکا مخالف مہم اس بات کی علامت ہے کہ یہ پابندیاں ماسکو پر واضح دباؤ ڈال رہی ہیں۔

یوکرینی تخمینے کے مطابق، نئی پابندیوں سے روس کی تیل کی برآمدات 50 فیصد تک کم ہو سکتی ہیں، جس سے کریملن کی آمدنی میں ماہانہ تقریباً پانچ ارب ڈالر کی کمی آئے گی۔ زیلنسکی نے امریکی کانگریس سے مزید ثانوی پابندیوں اور ہم آہنگ اقدامات کی اپیل کی ہے۔

انہوں نے برطانوی وزیرِاعظم کیئر اسٹارمر کی اُس تجویز کی بھی حمایت کی جس کے تحت غزہ منصوبے کی طرز پر ایک مختصر اور واضح فریم ورک کے تحت جنگ بندی پر کام کیا جا سکتا ہے۔ تاہم، ان کا کہنا تھا کہ فی الحال انہیں نہیں لگتا کہ پوتن امن کے لیے تیار ہیں۔

زیلنسکی کے مطابق، روسی افواج محاذوں پر کوئی خاص پیش رفت نہیں کر سکی ہیں، اور گزشتہ موسمِ گرما سے وہ زیادہ تر اپنے ہی دفاعی مورچوں میں محدود ہیں۔