اسرائیلی وزیراعظم کے نسل کشی کے دفاع کے بیانات ناقابل قبول:پاکستانی وزارت خارجہ

اسرائیلی وزیراعظم کے نسل کشی کے دفاع کے بیانات ناقابل قبول:پاکستانی وزارت خارجہ

 پاکستان کے دفتر خارجہ کے ترجمان نے کہا ہے کہ اسرائیلی وزیراعظم کی حالیہ تقریر، جس میں دوحہ میں اسرائیل کے کارروائی کو جواز دینے کی کوشش کی گئی، ناقابل قبول اور جواب دینے کے لائق نہیں ہے۔

ترجمان شفقت علی خان نے ہفتہ وار نیوز کانفرنس میں بتایا کہ جن افراد کے بیانات نسل کشی کو فروغ دیتے ہیں، ان پر ردعمل دینا فضول ہے۔ انہوں نے کہا کہ پاکستان خطے کے موجودہ حالات اور خلیجی ممالک کے مسائل کو قریب سے دیکھ رہا ہے اور ہر ممکنہ خطرے کا بھرپور جواب دینے کی صلاحیت رکھتا ہے۔

شفقت علی خان نے مزید کہا کہ پاکستان ایک ذمہ دار ایٹمی ملک ہے اور خطے میں امن و استحکام کو فروغ دینے کے لیے پرعزم ہے۔ انہوں نے خبردار کیا کہ کسی بھی خطرے یا پاکستان کی خودمختاری کے خلاف اقدامات پر سخت ردعمل دیا جائے گا۔

اسی سلسلے میں،پاکستان کے مستقل نمائندے عاصم افتخار احمد نے اقوام متحدہ کی سلامتی کونسل کے ہنگامی اجلاس میں اسرائیل کی توسیع پسندانہ پالیسی اور قانون شکنی پر تنقید کی۔ انہوں نے کہا کہ اسرائیل ایک جارح اور قابض ملک ہے اور بین الاقوامی قوانین اور انسانی حقوق کے بارے میں بات کرنے کا کوئی حق نہیں رکھتا۔

انہوں نے مزید کہا کہ اسرائیلی نمائندے نے اجلاس کے دوران دیگر شرکاء کی تقریریں نہیں سنیں، جو ناقابل قبول اور سلامتی کونسل کی حرمت کے خلاف ہے۔ افتخار احمد نے اس بات پر زور دیا کہ یہ پہلا موقع نہیں جب اسرائیل نے اقوام متحدہ کے اجلاسوں کا ناجائز فائدہ اٹھایا ہے۔