اسرائیل کے خلاف صحافتی آزادی کی خلاف ورزی پر فرانسیسی صحافیوں کی شکایت

?️ 4 دسمبر 2025

اسرائیل کے خلاف صحافتی آزادی کی خلاف ورزی پر فرانسیسی صحافیوں کی شکایت

فرانس کی نیشنل یونین آف جرنلسٹس (SNJ) اور انٹرنیشنل فیڈریشن آف جرنلسٹس (IFJ) نے اسرائیل کے خلاف صحافتی آزادی کو محدود کرنے کے الزام میں فرانسیسی قومی انسدادِ دہشت گردی عدالت (Pnat) میں باضابطہ شکایت درج کرائی ہے۔

یورونیوز کے مطابق، یہ دونوں تنظیمیں جو فرانس اور دنیا کی سب سے بڑی صحافی یونینز شمار ہوتی ہیں، منگل کے روز اسرائیل کے خلاف مقدمہ لے کر عدالت پہنچی ہیں۔ شکایت میں کہا گیا ہے کہ اسرائیل نے ایک منظم اور طویل مہم کے ذریعے غیر ملکی صحافیوں، خصوصاً فرانسیسی رپورٹرز، کو غزہ میں آزادانہ داخلے سے روکا ہے جس کا مقصد وہاں کی صورتحال کی آزادانہ اور محفوظ رپورٹنگ کو محدود کرنا ہے۔

درخواست کے مطابق 7 اکتوبر 2023 کے بعد سے کسی بھی غیر ملکی صحافی کو غزہ میں جانے کی اجازت نہیں دی گئی، جس کے نتیجے میں جاری جنگ کے دوران معلومات تک رسائی تقریباً ناممکن ہو گئی ہے۔ تنظیموں کا کہنا ہے کہ اس میڈیا بلیک آؤٹ کو فلسطینی صحافیوں کے خلاف اسرائیلی فورسز کی سخت کارروائیوں نے مزید تشویشناک بنا دیا ہے۔

مشترکہ بیان میں بتایا گیا ہے کہ صحافیوں کے راستے میں رکاوٹیں اسرائیلی فوج، پولیس، کسٹم حکام، سرکاری اہلکاروں، اور بعض اوقات نجی افراد اور آبادکاروں کی جانب سے پیدا کی گئیں۔ ان اقدامات کا مقصد واقعات کی درست اور غیر جانبدارانہ کوریج کو روکنا اور ایک طرفہ بیانیہ مسلط کرنا قرار دیا گیا ہے۔

علاقے میں موجود فرانسیسی صحافیوں نے بھی تصدیق کی ہے کہ انہیں کئی مقامات تک رسائی سے روکا گیا، ان کا سامان چیک یا ضبط کیا گیا، اور بعض کو دھمکیوں، جسمانی حملوں، گرفتاری، پوچھ گچھ، حراست اور جبری ملک بدری کا سامنا بھی کرنا پڑا۔ شکایت میں کہا گیا ہے کہ اسرائیل کے یہ اقدامات فرانسیسی صحافیوں کے خلاف جنگی جرائم کے زمرے میں آتے ہیں، جن کی تحقیقات کا اختیار فرانسیسی عدالت کے پاس موجود ہے۔

غزہ کے سرکاری میڈیا آفس نے اعلان کیا ہے کہ اسرائیلی حملوں کے آغاز سے اب تک 257 فلسطینی صحافی شہید ہو چکے ہیں۔ بیان میں کہا گیا کہ فلسطینی صحافیوں کو نشانہ بنانا ایک منصوبہ بند اور منظم کارروائی ہے اور عالمی صحافتی تنظیموں سے مطالبہ کیا گیا کہ وہ ان جرائم کی باضابطہ مذمت کریں۔ میڈیا آفس نے اسرائیل، امریکہ، برطانیہ، جرمنی اور فرانس کو ان حملوں کا براہِ راست ذمہ دار قرار دیتے ہوئے کہا کہ یہ ممالک غزہ میں جاری نسل کشی کے شریک ہیں۔