اسرائیل کا ترکی کی خصوصی ٹیم کو غزہ میں داخل ہونے سے روکنے کا فیصلہ

اسرائیل کا ترکی کی خصوصی ٹیم کو غزہ میں داخل ہونے سے روکنے کا فیصلہ

صہیونی ذرائع کے مطابق، اسرائیلی حکومت نے فیصلہ کیا ہے کہ وہ ترکی کی اس خصوصی ٹیم کو نوارِ غزہ میں داخل ہونے کی اجازت نہیں دے گی جو علاقے میں صہیونی قیدیوں کی لاشوں کی تلاش کے لیے بھیجی جا رہی تھی۔

فلسطینی میڈیا کے حوالے سے موصولہ اطلاعات کے مطابق، اسرائیل نے ترکیہ کے ماہرین پر مشتمل امدادی ٹیم کی غزہ میں داخلے کی درخواست مسترد کرنے کا فیصلہ کیا ہے۔

دو روز قبل امریکا کے سابق اعلیٰ مشیر اسٹیو بینن نے دعویٰ کیا تھا کہ ترکیہ کے صدر رجب طیب اردوغان اسرائیلی مخالفت کے باوجود ایک مشترکہ سیکیورٹی فورس کی قیادت کریں گے جس میں مصر، متحدہ عرب امارات اور ممکنہ طور پر سعودی عرب کے اہلکار بھی شامل ہوں گے۔

اسرائیلی اخبار معاریو کے مطابق، بینن جو اگرچہ حکومت میں کوئی باضابطہ عہدہ نہیں رکھتے لیکن صدر ڈونلڈ ٹرمپ کے قریبی مشیروں میں شمار کیے جاتے ہیں، نے اپنے ایک پادکاسٹ میں غزہ میں ایک مجوزہ فلسطینی ریاست کا ذکر کیا جس کی مالی معاونت قطر کرے گا۔ انہوں نے دعویٰ کیا کہ اس منصوبے پر براہِ راست ایک امریکی ٹیم کام کر رہی ہے جس میں جیرڈ کشنر (داماد ٹرمپ)، اسٹیو وٹکوف (امورِ مشرقِ وسطیٰ کے نمائندہ)، مارکو روبیو (وزیرِ خارجہ امریکا) اور جی ڈی وینس (نائب صدر امریکا) شامل ہیں۔

دوسری جانب، اسرائیلی وزیرِاعظم بنیامین نیتن یاہو نے حال ہی میں نائب صدر جی ڈی وینس سے ملاقات میں واضح طور پر کہا کہ ترک افواج کا غزہ میں داخلہ تل ابیب کے لیے سرخ لکیر ہے۔

اسرائیلی چینل 12 کے مطابق، نیتن یاہو نے اپنی ملاقات میں کہا کہ اسرائیل کسی بھی صورت میں ترکیہ کے اہلکاروں کو غزہ میں قدم رکھنے کی اجازت نہیں دے گا۔

ادھر، ترک صدر رجب طیب اردوغان نے گزشتہ ہفتے اپنے ملک کے فوجی اداروں کو براہِ راست ہدایت دی تھی کہ وہ امدادی اور فنی ماہرین کی ٹیمیں غزہ بھیجیں۔ ان ٹیموں کی ذمہ داریوں میں ملبے تلے دبے افراد اور لاشوں کی تلاش، انسانی امداد کی تقسیم، اور انسانی بحران کے خاتمے میں تعاون شامل بتایا گیا ہے۔