نو منتخب صدر کی پہلی پریس کانفرنس، سعودی عرب میں سفارت خانہ کھولنے کا اعلان کردیا

?️ 22 جون 2021

تہران (سچ خبریں) ایران کے نومنتخب صدر سید ابراہیم رئیسی نے ایران میں ہونے والے انتخابات میں شاندار کامیابی کے بعد پہلی پریس کانفرنس میں سعودی عرب کے ساتھ بہتر تعلقات قائم کرنے کا اعلان کرتے ہوئے ریاض میں اپنا سفارت خانہ اور تہران میں سعودی سفارتخانہ کھولنے کے لئے اپنے ملک کی تیاری کا اعلان کردیا۔

تفصیلات کے مطابق ایران کے نومنتخب صدر منتخب سید ابراہیم رئیسی نے سعودی عرب سے یمن میں جنگ ختم کرنے کا مطالبہ کرتے ہوئے کہا ہے کہ تہران کو ایران میں سعودی سفارت خانہ کھولنے اور اس کے برعکس کوئی اعتراض نہیں ہے۔

رئیسی نے دارالحکومت تہران میں ایک پریس کانفرنس سے خطاب کرتے ہوئے کہا کہ ہمارے تمام ممالک کے ساتھ تعلقات ہیں اور ہمارا رخ خاص طور پر ہمسایہ ممالک کے ساتھ تعلقات کو مستحکم کرنا ہوگا اور ایران میں سعودی سفارتخانہ کھولنے اور اس کے برعکس ہماری طرف سے کوئی مخالفت نہیں ہے۔

یمن کی صورتحال کے بارے میں، رئیسی نے کہا کہ یمن پر صرف یمنیوں کی حکومت ہونی چاہئے اور سعودی عرب اور اس کے اتحادیوں کو فوری طور پر یمن میں جاری جنگ کو بند کرنا چاہیئے۔

ایران کے نئے صدر نے کہا کہ ایران ہمسایہ اور علاقائي ممالک کے ساتھ تعلقات کو فروغ دینے کا خواہاں ہے اور علاقائی اور عالمی سطح پر امن و صلح کا خواہاں ہے۔

انھوں نے کہا کہ میری حکومت کی خارجہ پالیسی مشترکہ ایٹمی معاہدے تک محدود نہیں رہےگی اور ہم دنیا کے تمام ممالک کے ساتھ  باہمی احترام اور تعاون کی بنیاد پر تعلقات کو فروغ دیں گے۔

عالمی ذرائع ابلاغ کے مطابق نومنتخب ایرانی صدر کی پہلی پریس کانفرنس میں کئی عالمی و بین الاقوامی میڈیا نمائندوں نے شرکت کی اور سوالات کیے۔