اردوان کی اسرائیل کو تنبیہ، غزہ میں جنگ بندی کی خلاف ورزی پر تشویش

اردوان کی اسرائیل کو تنبیہ، غزہ میں جنگ بندی کی خلاف ورزی پر تشویش

 ترکی کے صدر رجب طیب اردوان نے اسرائیل کی جانب سے غزہ میں جنگ بندی کی مبینہ خلاف ورزیوں پر سخت ردعمل دیتے ہوئے خبردار کیا ہے کہ اسرائیلی حکومت جنگ بندی کے باوجود غزہ اور مغربی کنارے میں حملے تیز کر رہی ہے۔

روسی خبر رساں ادارے کے مطابق اردوان نے کہا کہ اسرائیل بین الاقوامی قوانین سے گریزاں ہے اور جنگ بندی کے باوجود فوجی کارروائیاں جاری رکھے ہوئے ہے۔ انہوں نے عالمِ اسلام سے اپیل کی کہ وہ غزہ کے عوام کے صبر و استقامت کو مشعلِ راہ بنائیں۔

اردوان کا کہنا تھا کہ غزہ کے عوام ملبے اور تباہ شدہ عمارتوں کے درمیان افطار کرتے ہوئے بھی ظلم کے سامنے نہیں جھکے، جو پوری امتِ مسلمہ کے لیے قابلِ تقلید مثال ہے۔

دوسری جانب غزہ کی وزارتِ صحت کے مطابق حالیہ اسرائیلی حملوں میں مزید 21 فلسطینی شہید اور 38 زخمی ہوئے ہیں۔ بیان میں کہا گیا کہ جنگ بندی کے نفاذ کے بعد سے اب تک سینکڑوں فلسطینی جاں بحق اور ہزاروں زخمی ہو چکے ہیں، جبکہ متعدد لاشیں ملبے تلے سے نکالی گئی ہیں۔

وزارتِ صحت کے اعداد و شمار کے مطابق 7 اکتوبر 2023 سے جاری اسرائیلی کارروائیوں میں شہدا اور زخمیوں کی مجموعی تعداد میں مسلسل اضافہ ہو رہا ہے، جس سے انسانی بحران مزید سنگین صورت اختیار کر گیا ہے۔