آلاسکا اجلاس میں زلنسکی کو نہ بلانے  پر روس کا رد عمل

آلاسکا اجلاس میں زلنسکی کو نہ بلانے  پر روس کا رد عمل

روس کی وزارتِ خارجہ کے خصوصی ایلچی برائے امورِ جنگِ اوکراین، رودیون میروشینک نے کہا ہے کہ ولودیمیر زلنسکی کو صدر ولادیمیر پوتن اور ڈونلڈ ٹرمپ کی مجوزہ ملاقات کے لیے الاسکا نہ بلایا جانا، اس بات کی واضح علامت ہے کہ عالمی سطح پر ان کی صدارت کو غیر مشروع سمجھا جا رہا ہے۔

روسی نشریاتی ادارے راشا ٹوڈے کے مطابق میروشینک نے صحافیوں سے گفتگو میں کہا کہ زلنسکی کا قانونی دورِ صدارت مئی 2024 میں ختم ہو چکا ہے لیکن وہ اب بھی خود کو صدر قرار دیتے ہیں، حالانکہ وہ کسی معاہدے پر دستخط کرنے کی قانونی حیثیت نہیں رکھتے۔

واضح رہے کہ زلنسکی نے دسمبر 2023 میں اعلان کیا تھا کہ جنگی حالات کے سبب یوکرین میں صدارتی اور پارلیمانی انتخابات ملتوی کر دیے جائیں گے۔ روسی حکام کا کہنا ہے کہ زلنسکی کے دستخط سے ہونے والا کوئی بھی معاہدہ مستقبل میں کالعدم قرار دیا جا سکتا ہے۔

صدر پوتن پہلے ہی کہہ چکے ہیں کہ اگر زلنسکی چاہیں تو مذاکرات میں شامل ہو سکتے ہیں، لیکن امن معاہدے پر دستخط کرنے کی ان کے پاس کوئی قانونی حیثیت نہیں۔

جمعہ کو الاسکا میں صدر ٹرمپ اور صدر پوتن کی تاریخی ملاقات ہو رہی ہے، جو ٹرمپ کی وائٹ ہاؤس واپسی کے بعد دونوں رہنماؤں کی پہلی براہِ راست نشست ہے۔ یہ ملاقات اس وقت ہو رہی ہے جب دونوں رہنماؤں کے درمیان رواں سال کے آغاز سے اب تک چھ ٹیلیفونک رابطے ہو چکے ہیں اور ریاض و استنبول میں یوکرین جنگ کے حل اور روس-امریکہ تعلقات کی بحالی کے لیے مذاکراتی سلسلے جاری ہیں۔

کاخِ سفید نے کوشش کی ہے کہ اس اجلاس کی توقعات کو محدود رکھا جائے اور اسے صرف خیالات کے تبادلےکا موقع بتایا ہے۔ تاہم صدر ٹرمپ نے کہا ہے کہ الاسکا میں پوتن کے ساتھ براہِ راست آتش‌بس پر بات ہوگی اور اگر پیش رفت ہوئی تو آئندہ اجلاس میں یوکرین کی شمولیت کے ساتھ امن معاہدے کی تفصیلات طے کی جائیں گی۔