آسٹریلیا اور جاپان کا روس پر پابندیاں عائد کرنے کا اعلان

24 فروری 2022

سچ خبریں:روس اور یوکرائن کے درمیان پیدا ہونے والی کشیدگی کے بعد متعدد ممالک نے روس کے خلاف پابندیاں عائد کرنے کا اعلان کیا ہے جن میں امریکہ،برطانیہ،یورپی یونین، جرمنی ،کینیڈا،آسٹریلیا اور جاپان شامل ہیں۔
روئٹرز نیوز ایجنسی کی رپورٹ کے مطابق روس کا یوکرائن کے 2 علاقوں ڈونٹسک اور لوہانسک کو آزاد ریاست تسلیم کرنے کے معاملے پر امریکہ، برطانیہ، یورپی یونین، جرمنی اور کینیڈا کے بعد آسٹریلیا اور جاپان نے بھی روس پر پابندیاں لگانے کا اعلان کردیا ہے، میلبرن اور ٹوکیو سے جاری بیانات میں آسٹریلوی وزیراعظم اور جاپانی وزیر اعظم نے کہا ہے کہ یوکرائن کے خلاف روسی اقدامات کے ذمہ دار افراد پر فوری پابندیاں لگائی جائیں گی۔

دونوں ممالک کے وزراء اعظم کا یہ بھی کہنا تھا کہ روس پر سفری اور مالیاتی پابندیاں بھی لگائی جائیں گی،واضح رہے کہ اس سے قبل روس کے صدر ولادیمیر پیوٹن نےاس ملک کی عوام سے خطاب کرتے ہوئے یوکرائن کے دو علاقوں کو آزاد تسلیم کیا گیا ہے، جس کے بعد انہوں نے آزاد ڈونٹسک اور لوہانسک میں امن دستے بھیجنے کا حکم بھی دیا تھا، اس کے علاوہ روسی صدر کا کہنا ہے کہ مینسک معاہدہ ختم ہوچکاہے نیز انھوں نے یہ بھی کہا کہ ہمارا یوکرائن پر قبضہ کرنے کا کوئی ارادہ نہیں ہے۔