صیہونیوں کا شام میں مداخلت کا نیا بہانہ

سچ خبریں:صیہونی حکومت نے شام میں دروزی اقلیت کی حمایت کا دعویٰ کرتے ہوئے حملے کیے، لیکن تجزیے بتاتے ہیں کہ یہ حملے دراصل حکومت جولانی کے ساتھ خفیہ روابط کو چھپانے اور شام میں صہیونی جارحیت کو جواز فراہم کرنے کی کوشش ہیں۔

مبصرین کے مطابق، اسرائیل کے حالیہ حملے جنہیں دروزی اقلیت کی حفاظت کے نام پر پیش کیا جا رہا ہے، درحقیقت شام میں جاری صہیونی منصوبوں کی پردہ پوشی کا ایک حربہ ہیں۔ یہ حملے اس تاثر کو قائم رکھنے کی کوشش ہیں کہ صہیونی حکومت اور جولانی انتظامیہ کے درمیان دشمنی موجود ہے، جبکہ زمینی حقیقت اس کے برعکس ہے۔

یہ بھی پڑھیں:صیہونی جنرل: فوج شام کے اندر اسٹریٹجک پوائنٹس پر موجود ہے

صہیونی وزیر جنگ اسرائیل کاتس نے یہ دعویٰ کیا کہ تل ابیب نے شام میں حکومت جولانی کے اہداف کو نشانہ بنا کر ایک واضح انتباہ دیا ہے۔ اس کے ساتھ ساتھ انہوں نے یہ بھی کہا کہ اسرائیل ہرگز اجازت نہیں دے گا کہ شام میں دروزیوں کو نقصان پہنچے۔

صیہونی حکومت شام میں اپنی جارحیت اور قبضے کو اقلیتوں کی حمایت جیسے دعووں سے جواز فراہم کر رہی ہے۔ خاص طور پر دروزیوں کے معاملے میں یہ دعویٰ اس وقت کیا گیا ہے جب اسرائیل جنوبی شام میں علاقوں کو محفوظ زون کے نام پر کاٹنے کی کوشش کر رہا ہے۔

تجزیے بتاتے ہیں کہ جولانی حکومت جو ایک سازش کے تحت اسرائیل، امریکہ، ترکی اور عرب ریاستوں کی پشت پناہی سے دمشق پر مسلط کی گئی تھی، نہ صرف صہیونی حملوں پر خاموش رہی، بلکہ بعض مواقع پر اسرائیل کے ساتھ تعلقات معمول پر لانے کی کوششیں بھی کیں۔ عبری میڈیا رپورٹس کے مطابق، جولانی نے جولان کی مقبوضہ پٹی پر بھی اپنی دعوے داری سے دستبردار ہونے کا عندیہ دیا ہے، تاکہ اسرائیل کے ساتھ تعلقات بہتر ہو سکیں۔

 لبنان میں دروزیوں کے رہنما ولید جنبلاط نے صیہونی عزائم کے حوالے سے بارہا خبردار کیا ہے، انہوں نے شام میں موجود دروزیوں سے اپیل کی ہے کہ وہ صہیونی سازشوں اور مشکوک اقدامات کے حوالے سے ہوشیار رہیں۔

قابل غور ہے کہ امریکہ نے کھلے الفاظ میں شام پر سے پابندیاں ختم کرنے کی شرط یہ رکھی ہے کہ جولانی حکومت بلا شرط اسرائیل کے ساتھ تعلقات کو معمول پر لائے۔ یہ تقاضا دراصل صہیونی مفادات کو محفوظ بنانے کے لیے دباؤ کا ایک طریقہ ہے۔

مزید پڑھیں:شامیوں کو امریکی زہریلی رشوت / کاغذ پر نیا مشرق وسطیٰ

تمام شواہد اس طرف اشارہ کرتے ہیں کہ اسرائیل کے حالیہ حملے دروزیوں کی حمایت کے بہانے کیے جا رہے ہیں تاکہ صہیونی-جولانی تعلقات کی حقیقت عوام سے چھپائی جا سکے،شام میں جارحیت اور قبضے کو جاری رکھنے کا جواز پیدا ہو، یہ تاثر دیا جائے کہ اسرائیل اور جولانی انتظامیہ ایک دوسرے کے دشمن ہیں، جبکہ وہ خفیہ طور پر تعاون کر رہے ہیں۔