صہیونی درندے ہیں،اپنے جرائم کی قیمت ادا کریں گے؛ ترکی کے صدر

?️ 12 جون 2026

سچ خبریں:ترکی کے صدر رجب طیب اردغان نے صہیونی حکومت پر شدید تنقید کرتے ہوئے اسے ایک وحشی وجود قرار دیا ہے جو صرف قتل و غارت، فساد، کشیدگی اور خطے میں عدم استحکام پھیلانے میں مصروف ہے۔

ترکی کے صدر رجب طیب اردغان نے صہیونی حکومت کو سخت تنقید کا نشانہ بناتے ہوئے اسے خطے میں قتل و غارت، فساد اور عدم استحکام کا ذمہ دار قرار دیا۔ انہوں نے غزہ کے لیے ترکی کی انسانی امداد کی تفصیلات بھی بیان کیں۔

الجزیرہ کے مطابق، ترکی کے صدر رجب طیب اردغان نے انقرہ میں ایک خطاب کے دوران صہیونی حکومت پر سخت تنقید کرتے ہوئے کہا کہ اس حکومت کی موجودہ کابینہ صرف قتل و غارت اور خطے میں فساد، کشیدگی اور عدم استحکام کے فروغ میں مصروف ہے۔

اردغان نے اپنے خطاب میں صہیونیوں کو ایسے وحشی قرار دیا جو خون کی بو سونگھتے ہیں۔ انہوں نے کہا کہ جلد یا بدیر وہ ان تمام خونوں کی قیمت ادا کریں گے جو انہوں نے بہائے ہیں۔

ترکی کے صدر نے اس بات پر زور دیا کہ آج لبنان صیہونی درندوں کے جرائم کا شکار ہے۔ انہوں نے کہا کہ تل ابیب کے رہنما آج ہٹلرکے طریقۂ کار کی پیروی کر رہے ہیں، لہٰذا ان کا انجام بھی تاریخ کے دیگر ظالم حکمرانوں جیسا ہوگا۔

انہوں نے ترکی کے ہلال احمر کی خدمات کو سراہتے ہوئے کہا کہ یہ ادارہ غزہ کے مظلوموں اور ضرورت مندوں کی مدد کے لیے مسلسل سرگرم عمل ہے۔

 ان کے بقول، ترکی ایک جانب دنیا بھر کے مظلوموں کی مدد کر رہا ہے اور دوسری جانب مجرموں کا تعاقب اور ان کا محاسبہ کرنے کی کوشش بھی جاری رکھے ہوئے ہے۔

ترکی کے صدر نے بتایا کہ سات اکتوبر سے اب تک ترکی کے ہلال احمر نے غزہ کی پٹی میں تیس ہزار افراد کو ایک کروڑ پچاس لاکھ کھانے فراہم کیے ہیں۔ اسی مدت کے دوران ترکی سے غزہ کے لیے چھبیس ہزار ٹن انسانی امداد بھی ارسال کی گئی ہے۔

اردغان نے مزید کہا کہ ترکی کا ہلال احمر فلسطین، بوسنیا اور ہرزیگوینا، افغانستان، صومالیہ، عراق شام میں انسانی امدادی سرگرمیوں کے ذریعے اپنے بھائیوں کو یاد رکھتا ہے اور انہیں فراموش نہیں کرتا۔