مغربی ساحل پر یمنی فورسز کی پیش قدمی جاری؛ جزائر زقر اور حنیش پر قبضے کے بعد باب المندب پر انصار اللہ کا کنٹرول مضبوط

?️ 11 ستمبر 2026

سچ خبریں:یمنی مسلح افواج نے مغربی ساحل پر پیش قدمی کرتے ہوئے جزائر زقر، حنیش بزرگ و کوچک اور میون کا کنٹرول سنبھال لیا ہے، جس سے باب المندب پر انصار اللہ کی گرفت تقریباً مکمل ہوگئی ہے۔

یمن کے مغربی ساحل کے مختلف محاذوں پر یمنی مسلح افواج کی پیش قدمی جاری ہے اور جزائر زقر، حنیش بزرگ اور حنیش کوچک کو آزاد کرائے جانے کے بعد انصار اللہ کے جنگجوؤں نے آبنائے باب المندب پر تقریباً مکمل کنٹرول حاصل کرلیا ہے۔

صنعا میں المیادین کے نمائندے نے بتایا ہے کہ اطلاعات کے مطابق یمنی مسلح افواج نے مغربی ساحلی علاقوں میں اپنی پیش قدمی جاری رکھتے ہوئے باب المندب کے اطراف میں واقع جزائر حنیش بزرگ اور حنیش کوچک تک رسائی حاصل کرلی ہے۔

میڈیا ذرائع کے مطابق جھڑپیں ختم ہونے کے بعد یمنی فورسز نے جزیرہ زقر کا مکمل کنٹرول بھی سنبھال لیا اور سعودی عرب کے 1500 سے زائد کرائے کے جنگجوؤں کو گرفتار کرلیا۔

یمنی فورسز کی جانب سے باب المندب میں واقع ان جزائر پر کنٹرول حاصل کیے جانے کے بعد اس اہم عالمی آبی گزرگاہ پر انصار اللہ کا کنٹرول تقریباً مکمل ہوگیا ہے۔ رپورٹ کے مطابق دنیا کی تقریباً 10 فیصد توانائی کی ترسیل اس آبی راستے سے ہوتی ہے۔

یہ پیش رفت ایسے وقت میں ہوئی ہے جب یمن کی انصار اللہ تحریک کے سیاسی دفتر کے رکن حزام الاسد نے سوشل میڈیا پلیٹ فارم ایکس پر اپنے ذاتی اکاؤنٹ میں لکھا تھا کہ کشیدگی کے جواب میں کشیدگی کے اصول کے تحت سعودی دشمن کی جانب سے المخا، ذوباب، میون یا یمن کے دیگر علاقوں میں بنیادی ڈھانچے، ہوائی اڈوں یا بندرگاہوں پر کسی بھی حملے کا جواب دیا جائے گا۔

تازہ ترین میدانی صورتحال کے حوالے سے روئٹرز نے سعودی عرب کی حمایت یافتہ یمنی حکومت کے 2 ذرائع کے حوالے سے بتایا ہے کہ سعودی حمایت یافتہ یمنی فورسز نے آبنائے باب المندب میں واقع جزیرہ بریم سے پسپائی اختیار کرلی ہے۔

ایک مقامی عہدیدار نے بھی بتایا کہ یمنی مسلح افواج نے جزیرہ میون کا کنٹرول سنبھال لیا ہے اور باب المندب پر اپنا کنٹرول مکمل کرلیا ہے۔

رائٹرز نے باخبر ذرائع کے حوالے سے مزید خبر دی ہے کہ یمنی مسلح افواج آبنائے باب المندب میں واقع ساحلی شہر ذوباب تک پہنچ گئی ہیں۔

المیادین کے نمائندے نے بتایا کہ المخا میں صورتحال معمول پر آگئی ہے۔ یہ شہر مکمل طور پر یمنی فوج کے کنٹرول میں ہے اور سرکاری اداروں کی سرگرمیاں بھی دوبارہ شروع ہوگئی ہیں۔

القاعدہ نیوز نیٹ ورک کے نمائندے کے مطابق یمنی مسلح افواج آئندہ چند گھنٹوں کے دوران سعودی عرب کے لیے لڑنے والے دشمن کے کرائے کے جنگجوؤں اور ان کے قبضے میں موجود ہتھیاروں کو صنعا منتقل کریں گی۔

دوسری جانب عرب ذرائع نے بتایا ہے کہ سعودی جنگی طیاروں نے یمن کے صوبہ تعز کے مغربی ساحل پر واقع المخا ایئرپورٹ پر 2 مرتبہ بمباری کی ہے۔ بین الاقوامی تنظیم برائے مہاجرت نے بھی اعلان کیا ہے کہ جنوب مغربی یمن کے حالیہ تنازع کے دوران کم از کم 46000 افراد بے گھر ہوئے ہیں۔

یونیوز نے بھی بعض یمنی میڈیا ذرائع کے حوالے سے تصاویر جاری کرتے ہوئے خبر دی ہے کہ یمنی مسلح افواج نے صوبہ لحج کے ساحلی علاقے رأس العارہ میں سعودی حمایت یافتہ کرائے کے جنگجوؤں کے ٹھکانوں پر بیلسٹک میزائلوں سے حملہ کیا ہے۔