امریکی عہدیدار اور اقوام متحدہ میں ایرانی نمائندگی کا ٹرمپ کے مبینہ خط پر ردعمل  

سچ خبریں:اقوام متحدہ میں اسلامی جمہوریہ ایران کے نمائندے اور ایک امریکی عہدیدار نے سابق امریکی صدر ڈونلڈ ٹرمپ کے ایرانی رہبر اعلیٰ کو لکھے گئے مبینہ خط پر ردعمل دیا ہے۔  

ایک امریکی عہدیدار نے الجزیرہ کو بتایا کہ ٹرمپ نے ایران کے رہبر کو ایک خط لکھا تھا لیکن یہ ابھی تک ارسال نہیں کیا گیا۔

یہ بھی پڑھیں:امریکہ نے ہمارے اور خطہ کے بارے میں غلط راستے کو چُنا ہے:آیت اللہ خامنہ ای

دوسری جانب اقوام متحدہ میں ایران کی نمائندگی نے جمعہ کے روز مقامی وقت کے مطابق میڈیا کے سوالات کا جواب دیتے ہوئے کہا کہ ہمیں ابھی تک امریکہ کے سابق صدر کی جانب سے کوئی خط موصول نہیں ہوا۔

سابق امریکی صدر ڈونلڈ ٹرمپ نے فاکس بزنس کو دیے گئے ایک انٹرویو میں دعویٰ کیا کہ انہوں نے ایران کے رہبر اعلیٰ کو خط بھیجا اور مذاکرات کی درخواست کی ہے۔

امریکی ویب سائٹ آکسیوس کے مطابق ٹرمپ کا کہنا ہے کہ انہوں نے ایرانی رہبر کو ایک خط بھیجا ہے جس میں جوہری معاہدے کی پیشکش کی گئی ہے۔

رپورٹ میں مزید کہا گیا ہے کہ ٹرمپ نے بدھ کے روز آیت اللہ علی خامنہ ای کو ایک خط بھیجا جس میں انہوں نے اس بات پر زور دیا کہ وہ ایران کے جوہری پروگرام پر ایک نیا معاہدہ کرنا چاہتے ہیں۔

آکسیوس نے لکھا کہ ٹرمپ کے اس خط کو، جس کا انہوں نے فاکس بزنس کی ماریا بارتیرومو کے ساتھ انٹرویو میں انکشاف کیا، امریکہ اور ایران کے درمیان نئی امریکی انتظامیہ کے اقتدار میں آنے کے بعد پہلا اہم تعامل قرار دیا جا رہا ہے۔

انٹرویو کے دوران، ٹرمپ نے ایک بار پھر یہ دعویٰ کیا کہ وہ ایران کے ساتھ جوہری معاہدے پر مذاکرات کے خواہشمند ہیں، ان کا کہنا تھا کہ کچھ نہ کچھ کیا جانا چاہیے، کیونکہ ایران کو جوہری ہتھیار حاصل کرنے کی اجازت نہیں دی جا سکتی۔

ایران کے رہبر اعلیٰ آیت اللہ خامنہ ای پہلے ہی واضح کر چکے ہیں کہ وہ ٹرمپ انتظامیہ کے ساتھ براہ راست مذاکرات کی حمایت نہیں کرتے کیونکہ وہ امریکہ پر اعتماد نہیں رکھتے۔

مزید پڑھیں: ٹرمپ سے بڑے بڑے بھی غزہ کا کچھ نہیں بگاڑ سکے:حماس

 ایرانی صدر مسعود پزشکیان نے بھی کہا کہ وہ امریکہ سے مذاکرات کی حمایت کرتے ہیں لیکن وہ اس حوالے سے رہبر اعلیٰ کی ہدایات پر عمل کریں گے۔