امریکہ اپنے مخالفین کے خلاف ٹیکنالوجی کا غلط استعمال کررہا ہے: روس

16 مارچ 2021

ماسکو (سچ خبریں) روس نے امریکہ پر شدید الزامات عائد کرتے ہوئے کہا ہے کہ امریکہ اپنے مخالفین کے خلاف ٹیکنالوجی کا غلط استعمال کررہا ہے۔

تفصیلات کے مطابق روس نے کہا ہے کہ امریکہ ٹیکنالوجک امکانات کو ناحق رقابت کے لئے استعمال کر رہا ہے اور امریکی سوشل میڈیا کمپنیاں مندرجات کو من پسند شکل میں سینسر کر رہی ہیں۔

روس وزارت خارجہ کی ترجمان ماریہ ظاہرووا نے فیس بُک سے جاری کردہ بیان میں کہا ہے کہ سوشل میڈیا پلیٹ فورموں کا معیاروں سے محروم ہونا ایک ٹیکنالوجکل دلدل کا سبب بن رہاہے۔

ظاہرووا نے کہا ہے کہ بعض سوشل میڈیا نگران کسی عدالتی حکم یا بااختیار محکمے کے فیصلے کی ضرورت محسوس کئے بغیر من پسند شکل میں ڈیجیٹل مندرجات کو سینسر کر دیتے ہیں۔

انہوں نے کہا ہے کہ اس طریقے سے واشنگٹن، اپنے ہدف کے انفارمیشن اور ٹیکنالوجی امکانات کو ہر شعبے میں ناحق رقابت کے آلہ کار کے طور پر استعمال کر رہا ہے۔

واضح رہے کہ روس نے گذشتہ ہفتے ٹویٹر کی طرف سے ممنوعہ مواد کو نشریات سے نہ ہٹائے جانے کی وجہ سے ٹویٹر کی انٹرنیٹ رفتار کو گرانے کا اعلان کیا تھا۔

ماسکو کی طرف سے ٹویٹر پلیٹ فورم کو مکمل طور پر ممنوع قرار دینے کی دھمکی کے بعد روس اور امریکہ کی سوشل میڈیا کمپنیوں کے درمیان تناو میں اضافہ ہو گیا تھا۔

واضح رہے کہ اس سے قبل امریکہ نے روس پر الزام لگایا تھا کہ اس نے طالبان کو خاموشی کے ساتھ چھوٹے ہتھیار فراہم کیے ہیں۔

نیویارک ٹائمز نے ایک رپورٹ شائع کرتے ہوئے کہا تھا کہ اس بارے میں مختلف نظریات موجود ہیں کہ روس حملوں میں طالبان کی مدد کیوں کرے گا، ان نظریات میں ایک یہ ہے کہ روس امریکہ کو افغانستان میں الجھائے رکھنا چاہتا ہے۔

اخبار کے مطابق یہ بھی ہو سکتا ہے کہ روسی یونٹ شام میں روس کے لڑنے والوں کی امریکہ کے ہاتھوں ہلاکت کا بدلہ لینا چاہتا ہو، کیونکہ شام میں روس صدر بشارالاسد کی حکومت کی مدد کر رہا ہے۔