نیتن یاہو کے امریکہ دورے کا اصلی مقصد؛صہیونی سفیر کی زبانی

?️ 1 فروری 2025

سچ خبریں:امریکہ میں تعینات اسرائیلی سفیر نے کہا ہے کہ وزیراعظم بنیامین نیتن یاہو کے دورۂ واشنگٹن کا سب سے اہم ایجنڈا ایران کے مبینہ خطرے پر گفتگو کرنا ہوگا۔

الجزیرہ نیوز چینل کی رپورٹ کے مطابق، امریکہ میں تعینات اسرائیلی سفیر یحیئیل لیتر نے فاکس نیوز کو دیے گئے ایک انٹرویو میں کہا کہ اسرائیل کی اولین ترجیح ایران کے خلاف سفارتی اور سیاسی دباؤ کو بڑھانا ہے۔

یہ بھی پڑھیں: امریکی نائب وزیر خارجہ اور صیہونی قومی سلامتی کے مشیر کی ملاقات

انہوں نے کہا کہ تل ابیب کو امید ہے کہ اس کے اتحادی ایران کے جوہری پروگرام اور اس کے خطے میں اثر و رسوخ کو محدود کرنے کے لیے سخت اقدامات کریں گے۔

اپنے انٹرویو میں لیتر نے مزید کہا کہ اسرائیل کو توقع ہے کہ غزہ میں جنگ بندی مزید برقرار رہے تاکہ تمام اسرائیلی قیدیوں کی واپسی ممکن ہو سکے۔

ان کا کہنا تھا کہ اسرائیل، حماس اور دیگر مزاحمتی گروہوں کے خلاف دباؤ بڑھانے کے لیے تمام سفارتی آپشنز پر غور کر رہا ہے۔

رپورٹس کے مطابق، اسرائیلی وزیراعظم بنیامین نیتن یاہو آئندہ ہفتے واشنگٹن کا دورہ کریں گے، جہاں ان کی ملاقات امریکہ کے نو منتخب صدر ڈونلڈ ٹرمپ سے متوقع ہے، اگر یہ ملاقات ہوتی ہے تو نیتن یاہو ٹرمپ سے ملاقات کرنے والے پہلے عالمی رہنما ہوں گے۔

اسرائیلی سفیر کے مطابق نیتن یاہوکے دورۂ واشنگٹن میں ایران کو مرکزی حیثیت حاصل ہے، تل ابیب چاہتا ہے کہ امریکہ ایران پر مزید دباؤ ڈالے، خاص طور پر اس کے جوہری پروگرام کے خلاف سخت پابندیاں عائد کرے۔

اسرائیل یہ الزام عائد کرتا ہے کہ ایران خطے میں اسرائیلی مفادات کے لیے سب سے بڑا خطرہ ہے اور امریکا سمیت دیگر عالمی طاقتوں کو اس کے خلاف سخت اقدامات کرنے چاہیے۔

یہ دورہ ایسے وقت میں ہو رہا ہے جب ایران اور اسرائیل کے درمیان کشیدگی بڑھتی جا رہی ہے، حالیہ مہینوں میں دونوں ممالک کے درمیان پراکسی جنگ میں شدت آئی ہے اور اسرائیل خطے میں ایران کے اثر و رسوخ کو کمزور کرنے کے لیے امریکا اور مغربی طاقتوں کی مدد چاہتا ہے۔

تجزیہ کاروں کے مطابق، نیتن یاہو کا دورہ امریکی-اسرائیلی تعلقات کو مزید مضبوط کرنے کا موقع فراہم کرے گا، اس ملاقات میں دفاعی معاہدوں، جدید ہتھیاروں کی فراہمی اور خطے میں اسرائیل کے اسٹریٹیجک مفادات کے تحفظ پر بھی بات چیت متوقع ہے۔

Short Link

Copied