صیہونی فوج کی حالت زار؛ قابض فوج کے چیف آف اسٹاف کی زبانی

?️ 11 مئی 2026

سچ خبریں:صیہونی فوج کے چیف آف اسٹاف ایال زامیر نے تسلیم کیا ہے کہ مختلف محاذوں پر جاری جنگ کے باعث فوج کو شدید افرادی قلت اور فرسودگی کا سامنا ہے اور فوری طور پر نئے فوجیوں کی ضرورت ہے۔

ایال زامیر نے صہیونی فوج میں افرادی قوت کی شدید کمی اور مسلسل جنگی دباؤ کے باعث فوجی ڈھانچے کے کمزور ہونے کا اعتراف کیا ہے۔

رشیا ٹوڈے کی رپورٹ کے مطابق صیہونی فوج کے چیف آف اسٹاف نے ایک بار پھر ریزرو فوجیوں کی صورتحال پر تشویش کا اظہار کیا ہے۔

انہوں نے صہیونی پارلیمان (کنیسٹ) کی خارجہ و دفاعی کمیٹی کے اجلاس میں کہا کہ انہیں سیاسی یا قانون سازی کے معاملات سے کوئی سروکار نہیں، ان کا کام متعدد محاذوں پر جاری جنگ کا انتظام کرنا ہے، اور اس مقصد کے لیے فوری طور پر مزید فوجیوں کی ضرورت ہے۔

ان کے مطابق موجودہ جنگی حالات میں فوجی ڈھانچہ شدید دباؤ کا شکار ہے اور ریزرو فورسز پر بوجھ مسلسل بڑھ رہا ہے، جس کے نتیجے میں فوجی صلاحیت متاثر ہو رہی ہے۔

اس بیان کے ردعمل میں اپوزیشن رہنما گادی آیزنکوٹ نے حکومتِ نیتن یاہو پر شدید تنقید کرتے ہوئے کہا کہ سیاسی قیادت مسلسل سکیورٹی اداروں کی وارننگز کو نظرانداز کر رہی ہے اور اپنی ذمہ داریوں سے گریز کر رہی ہے۔

انہوں نے کہا کہ موجودہ کابینہ اگر اس نازک صورتحال میں بڑے پیمانے پر فوجی بھرتی کا فیصلہ نہیں کرتی تو وہ اقتدار میں رہنے کی صلاحیت نہیں رکھتی۔

آیزنکوٹ نے مزید کہا کہ اپوزیشن آئندہ انتخابات میں لازمی فوجی خدمت کے قانون، 7 اکتوبر کے واقعات کی تحقیقات کے لیے کمیشن کے قیام اور داخلی سلامتی کے لیے نئی حکمت عملی کی تیاری جیسے اقدامات کے لیے کوشش کرے گی۔