ریاض (سچ خبریں) سعودی عرب کے مفتی اعظم نے کورونا وائرس کے مریضوں کے حوالے سے اہم فتویٰ جاری کرتے ہوئے کہا ہے کہ کورونا وائرس کے مریضوں کا دوسرے لوگوں سے ملنا جلنا حرام ہے۔
تفصیلات کے مطابق سعودی عرب کے مفتی اعظم اور علما کونسل کے چیئرمین الشیخ عبدالعزیز بن عبداللہ کا کہنا ہے کہ کورونا وائرس سے متاثرہ مریض کا دوسرے لوگوں سے میل جول کرنا حرام ہے۔
مفتی اعظم الشیخ عبدالعزیز نے کہا کہ عوام کورونا وائرس کی روک تھام کے لیے ایس او پیز پر عمل کریں، صحت عظیم نعمتوں میں سے ایک ہے، انسان کو اس کی قدر کرنی چاہیے۔
انہوں نے مزید کہا کہ اسلام وبا کے شکار افراد سے صحت مند افراد کی جانوں کے تحفظ پر زور دیتا ہے، شہریوں کو چاہیے کہ وہ اسلام کی تعلیمات پر عمل کرتے ہوئے اپنی اور دوسروں کی صحت کی حفاظت کریں۔
سعودی مفتی اعظم نے شہریوں اورغیر ملکیوں پر زور دیتے ہوئے کہا کہ وہ وبا کی روک تھام کے لیے حکومت اور سرکاری اداروں کی طرف سے وضع کردہ شرائط و ضوابط پر سختی کے ساتھ عمل کریں۔
