روس کا امریکی وزیر خارجہ پر عائد پابندیاں برقرار رکھنے کا اعلان  

سچ خبریں:روسی وزارت خارجہ کی ترجمان ماریا زاخارووا نے واضح کیا ہے کہ امریکی وزیر خارجہ مارکو روبیو تاحال روسی پابندیوں کی فہرست میں شامل ہیں اور ان پر عائد پابندیاں ختم کرنے کی خبریں بے بنیاد ہیں۔  

یہ بھی پڑھیں: روس پر سے پابندیاں ہٹانے کے لیے یورپ میں بڑے پیمانے پر مظاہرے

رشیا ٹوڈے کی رپورٹ کے مطابق روسی وزارت خارجہ کی ترجمان ماریا زاخارووا نے اتوار کے روز روسی خبر رساں ایجنسی ٹاس سے گفتگو میں تصدیق کی کہ مارکو روبیو پر عائد روسی پابندیاں بدستور نافذ العمل ہیں اور اس حوالے سے پھیلائی گئی تمام خبریں جھوٹ پر مبنی ہیں۔

یاد رہے کہ سوشل میڈیا پر یہ خبریں گردش کر رہی تھیں کہ امریکہ اور روس کے وزرائے خارجہ کے درمیان گفتگو کے بعد، ماسکو ممکنہ طور پر مارکو روبیو پر عائد پابندیاں واپس لینے پر غور کر رہا ہے، تاہم زاخارووا کے بیان نے ان تمام قیاس آرائیوں کو رد کر دیا۔

واضح رہے کہ روسی حکومت نے مئی 2022 میں مارکو روبیو پر جوابی پابندیاں عائد کی تھیں، جو کہ امریکہ کی جانب سے روسی شہریوں اور حکام پر لگائی گئی پابندیوں کے ردعمل میں تھیں، ان امریکی اقدامات کا آغاز روس کی یوکرین میں خصوصی فوجی کارروائی کے بعد ہوا تھا۔

ان پابندیوں کے تحت، مارکو روبیو کو روس میں داخلے پر پابندی کا سامنا ہے اور وہ روسی فہرست میں شامل ان امریکی شہریوں میں شامل ہیں، جن پر ماسکو نے جوابی اقتصادی اور سفری اقدامات کیے ہیں۔

مزید پڑھیں: امریکہ کا روس کے خلاف مزید پابندیوں کا اعلان

روسی صدارتی دفتر کریملن کے ترجمان دیمتری پسکوف نے نومبر 2024 میں واضح کیا تھا کہ جب تک روسی وزیر خارجہ سرگئی لاوروف پر امریکی پابندیاں برقرار رہیں گی، روسی حکومت بھی مارکو روبیو پر عائد پابندیاں ختم نہیں کرے گی۔