انسانی حقوق کونسل میں پاکستان کا اصولی مؤقف قابلِ تحسین؛ ایرانی سفیر کا اظہارِ تشکر

?️ 24 جنوری 2026

سچ خبریں:پاکستان میں ایران کے سفیر نے اقوامِ متحدہ کی انسانی حقوق کونسل میں ایران مخالف قرارداد کے خلاف ووٹ دینے پر پاکستان کے اصولی اور تاریخی مؤقف کو سراہتے ہوئے حکومتِ پاکستان کا شکریہ ادا کیا ہے۔

پاکستان میں اسلامی جمہوریہ ایران کے سفیر رضا امیری مقدم نے اقوامِ متحدہ کی انسانی حقوق کونسل میں ایران مخالف قرارداد کی مخالفت اور منفی ووٹ دینے پر حکومتِ پاکستان کے اصولی اور جرات مندانہ مؤقف کو سراہتے ہوئے اس کا شکریہ ادا کیا ہے۔

یہ بھی پڑھیں:پاکستان ایران کے ساتھ تاریخی اور برادرانہ تعلقات کیلئے پرعزم ہے.شہبازشریف

ایرانی سفیر نے سوشل میڈیا پلیٹ فارم ایکس (سابقہ ٹوئٹر) پر اپنے سرکاری اکاؤنٹ میں لکھا کہ وہ وزیر اعظم شہباز شریف کی قیادت میں حکومتِ پاکستان اور محمد اسحاق ڈار (نائب وزیر اعظم و وزیر خارجہ) کے تہِ دل سے شکر گزار ہیں، جنہوں نے جنیوا میں اقوامِ متحدہ کی انسانی حقوق کونسل میں اسلامی جمہوریہ ایران کی تاریخی اور بے لوث حمایت کی، بالخصوص ایران کے خلاف پیش کی گئی غیر منصفانہ قرارداد پر ووٹنگ کا مطالبہ کرنے اور اس کے خلاف منفی ووٹ دینے پر۔

انہوں نے مزید کہا کہ وہ جنیوا میں پاکستان کی مستقل نمائندگی کے اہل اور پیشہ ور سفارتی عملے کی انتھک کاوشوں اور قربانیوں پر خصوصی طور پر قدردانی کرتے ہیں، جنہوں نے انصاف کے قیام کے لیے بھرپور کردار ادا کیا۔

رضا امیری مقدم نے زور دیا کہ پاکستان کا یہ اصولی مؤقف گزشتہ ایک سال کے دوران ایران کے خلاف سیاسی محرکات پر مبنی اور بے بنیاد اقدامات کی تیسری مسلسل ناکامی کی علامت ہے، جن میں بلاجواز ۱۲ روزہ فوجی جارحیت، بیرونی حمایت سے ہونے والی حالیہ بدامنیوں کے ذریعے ملک کو عدم استحکام سے دوچار کرنے کی کوششیں، اور بعض فریقوں کی جانب سے بین الاقوامی اداروں کے ناجائز استعمال کے ذریعے ایران مخالف ایجنڈا آگے بڑھانا شامل ہے۔

انہوں نے کہا کہ پاکستان کی جانب سے یہ مستقل اور مضبوط حمایت انصاف، کثیرالجہتی نظام، انسانی حقوق کے احترام اور قومی خودمختاری سے وابستگی کا واضح اظہار ہے، جسے ایران ہمیشہ قدر کی نگاہ سے یاد رکھے گا۔

رپورٹ کے مطابق، اقوامِ متحدہ کی انسانی حقوق کونسل کا انتالیسواں خصوصی اجلاس گزشتہ روز (جمعہ) جنیوا میں منعقد ہوا، جس کا ایجنڈا اسلامی جمہوریہ ایران میں انسانی حقوق کی صورتحال سے متعلق الزامات پر مبنی تھا۔

اس موقع پر جنیوا میں اقوامِ متحدہ کے لیے پاکستان کے مستقل مشن کے قونصلر منیب احمد نے ایران مخالف قرارداد کے خلاف ووٹ دیتے ہوئے کہا کہ پاکستان ہمیشہ ہر جگہ ایران اور ایرانی عوام کا دوست رہے گا۔ انہوں نے یاد دلایا کہ ایران وہ پہلا ملک تھا جس نے پاکستان کی آزادی کو تسلیم کیا۔

منیب احمد نے کہا کہ داخلی یا علاقائی حالات سے قطع نظر، پاکستان اور ایران کے عوام کے درمیان ثقافت، تاریخ اور مشترکہ ایمان پر مبنی مضبوط دوستی کے رشتے ہمیشہ قائم رہے ہیں۔

انہوں نے ایران میں تشدد کے خاتمے اور بتدریج معمول کی صورتحال کی بحالی کا خیر مقدم کرتے ہوئے کہا کہ پاکستان، ایران کے قانونی عمل کی پاسداری کے عزم پر بھی یقین رکھتا ہے۔

پاکستانی نمائندے نے مزید کہا کہ حالیہ احتجاجات کو اُس انسانی المیے اور تباہی سے الگ نہیں کیا جا سکتا جو گزشتہ سال جون میں ایک علاقائی جارح کی غیر قانونی فوجی کارروائیوں کے نتیجے میں ایرانی عوام کو برداشت کرنا پڑی۔ ان کے مطابق، ایران اور پورے خطے میں انسانی حقوق کے تحفظ کی سب سے بڑی ضمانت امن اور استحکام ہے۔

انہوں نے واضح کیا کہ پابندیاں، فوجی کارروائیاں اور بیرونی مداخلت صرف ایران میں عوامی تکالیف میں اضافہ کرتی ہیں، اور ایران کی رضامندی کے بغیر عائد کیے گئے فیصلوں کی اخلاقی و قانونی حیثیت ہمیشہ مشکوک رہے گی۔

مزید پڑھیں:تجارتی تعاون، سفارتی تعلقات اور علاقائی استحکام ایرانی صدر کے دورہ پاکستان میں اہم ترجیحات

منیب احمد نے آخر میں کہا کہ تصادم کا راستہ حقیقی مکالمے کے امکانات کو کمزور کرتا ہے، انسانی حقوق کونسل کے عالمی مشن کو انتخابی رویے کے الزام کی زد میں لاتا ہے، اور بالآخر ایرانی عوام کے انسانی حقوق کو نقصان پہنچاتا ہے۔