پاک بھارت جنگی کشیدگی؛ غذائی ذخائر، پناہ گاہوں کی تلاش اور میزائلوں کا خوف

سچ خبریں:پہلگام حملے کے بعد بھارت اور پاکستان کے درمیان شدید کشیدگی کے نتیجے میں سرحدی شہریوں نے غذائی اشیاء جمع کرنا شروع کر دی ہیں، پناہ گاہوں کی تلاش میں نقل مکانی ہو رہی ہے، اور کشمیر میں لوگ بمباری کے دوران زیر زمین پناہ گاہوں میں رات گزارنے پر مجبور ہیں۔

بھارت اور پاکستان کے درمیان حالیہ دنوں میں بڑھتی ہوئی جنگی کشیدگی نے دونوں ملکوں کے سرحدی علاقوں میں ایک غیر معمولی صورت حال پیدا کر دی ہے، جہاں شہری روزمرہ زندگی کو چھوڑ کر اب اپنی بقا کی جنگ لڑ رہے ہیں۔

یہ بھی پڑھیں:قومی سلامتی کمیٹی نے پاکستان کی مسلح افواج کو جوابی کارروائی کی اجازت دے دی

روئٹرز خبر رساں ایجنسی کی رپورٹ کے مطابق، پہلگام میں سیاحوں پر حملے اور اس کے بعد بھارت کی جانب سے پاکستان میں مبینہ دہشتگرد ٹھکانوں پر جوابی کارروائی کے بعد دونوں ممالک نے ایک دوسرے پر ڈرون اور توپ خانے سے حملوں کے الزامات عائد کیے ہیں۔ یہ کشیدگی گزشتہ 30 برسوں کی بدترین جنگی فضا قرار دی جا رہی ہے۔

سرحدی علاقوں کے مکین بڑی تعداد میں بازاروں کا رخ کر رہے ہیں۔ پاکستانی شہر لاہور اور بھارتی ریاست پنجاب کے شہریوں نے راشن، گیس سلنڈر، ادویات اور دیگر ضروری سامان جمع کرنا شروع کر دیا ہے۔

لاہور میں بھارتی ڈرون حملے کے بعد، ایمرجنسی سائرن بجائے گئے اور امریکی قونصل خانے نے عملے کو فوری طور پر محفوظ مقامات پر منتقل ہونے کی ہدایت جاری کی۔

لاہور میں اسکول بند کر دیے گئے اور حکومتی اداروں نے ذخیرہ اندوزی اور منافع خوری پر کاروباری حلقوں کو سخت وارننگ دی ہے۔

کشمیر میں لائن آف کنٹرول کے قریب صورتحال نہایت تشویشناک ہے، مقامی افراد نے بتایا کہ وہ رات کے وقت پناہ گاہوں میں بسر کر رہے ہیں، کیونکہ وادی میں مسلسل گولہ باری ہو رہی ہے، وزیرِاعظم آزاد کشمیر کے دفتر نے تصدیق کی ہے کہ دو مختلف علاقوں سے 400 سے زائد افراد کو محفوظ مقامات پر منتقل کیا جا چکا ہے۔

مزید پڑھیں:پاکستان پر بھارتی میزائل حملے مودی حکومت کے ہندو توا ایجنڈے کا تسلسل ، حریت کانفرنس

یہ بحران اس وقت شدت اختیار کر گیا جب بھارت نے بدھ کے روز پاکستان کے اندر متعدد اہداف کو نشانہ بنایا، جنہیں وہ دہشتگردوں کے اڈے قرار دے رہا ہے، اس حملے کو گزشتہ ماہ کے سیاحوں پر ہونے والے حملے کا ردعمل قرار دیا گیا ہے۔