الجولانی کا یمن جنگ کے لیے 10 ہزار جنگجو سعودی عرب بھیجنے کا فیصلہ

?️ 20 اکتوبر 2026

سچ خبریں:یمن میں جاری لڑائی کے دوران سعودی عرب کو درپیش مشکلات کے نئے پہلو سامنے آنے کے بعد، ابو محمد الجولانی نے بھی مبینہ طور پر 10 ہزار نیم فوجی اہلکار سعودی عرب بھیجنے کا فیصلہ کیا ہے۔

اخبار الاخبار کی رپورٹ کے مطابق، شام کی خود ساختہ حکومت کے ایک اعلیٰ سطحی فوجی وفد نے سعودی حکام سے تقریباً 10 ہزار شامی جنگجوؤں کو یمن کی جنگ میں شریک کرنے کے لیے مذاکرات کیے ہیں۔ دمشق نے اس سے متعلق اطلاعات کی تردید کی ہے۔

الاخبار کے مطابق، خود ساختہ شامی حکومت کا ایک اعلیٰ سطحی فوجی وفد گزشتہ چند روز کے دوران سعودی عرب کے دارالحکومت ریاض پہنچا، جہاں اس نے سعودی حکام کے ساتھ مشاورت اور مذاکرات کیے۔

یمن کے انٹیلی جنس ذرائع نے اخبار الاخبار کو بتایا کہ ان مذاکرات کا بنیادی محور تقریباً 10 ہزار شامی جنگجوؤں کو یمن کی جنگ میں شرکت کے لیے منتقل کرنے کے انتظامات کا جائزہ لینا تھا۔ امکان ظاہر کیا گیا ہے کہ ان جنگجوؤں کا انتخاب زیادہ تر غیر ملکی انتہا پسند جنگجوؤں میں سے کیا جائے گا، جنہیں رپورٹ میں دہشت گرد قرار دیا گیا ہے۔

یہ اطلاعات ایسے وقت میں سامنے آئی ہیں جب الجولانی کی حکومت نے دمشق کی جانب سے ہزاروں مسلح افراد کو سعودی عرب کے جنوبی علاقوں میں بھیجنے کے فیصلے سے متعلق خبروں کو مسترد کردیا ہے۔ تاہم، ریاض میں ہونے والے مذاکرات کے ساتھ ساتھ شام کے ایک فوجی مشاورتی گروپ نے سعودی عرب کے جنوبی علاقوں نجران اور عسیر کا دورہ بھی کیا ہے۔

یمن میں سعودی عرب اور اس کے حمایت یافتہ جنگجوؤں کی ناکامی کے بعد، بعض عرب حکومتیں کوشش کررہی ہیں کہ اس ملک میں غیر ملکی فوجی بھیج کر، خواہ یہ اقدام محض علامتی ہی کیوں نہ ہو، سعودی فوج کے حوصلے بلند کیے جائیں اور یمنی مسلح افواج کی مسلسل کامیابیوں کی اہمیت کو کم کرکے پیش کیا جائے۔

اسی سلسلے میں، مصر کے صدر عبدالفتاح السیسی کی حکومت نے بھی اعلان کیا ہے کہ وہ اپنے فوجی سعودی عرب بھیجے گی۔ اس سے قبل پاکستان نے بھی یمن کی جنگ میں مدد کے لیے سعودی عرب میں اپنی فوج تعینات کرنے کی اطلاع دی تھی۔