سچ خبریں:اقوام متحدہ کی طرف سے جاری کردہ اعداد و شمار کے مطابق بھارت 2023 کے وسط تک دنیا کی سب سے زیادہ آبادی والے ملک کے طور پر چین کو پیچھے چھوڑ دے گا۔
اقوام متحدہ کی جانب سے بدھ کو جاری کردہ اعداد و شمار کے مطابق، بھارت 2023 کے وسط تک دنیا کی سب سے زیادہ آبادی والا ملک ہونے کے اعتبار سے چین کو پیچھے چھوڑ دے گا،اقوام متحدہ کی رپورٹ کے مطابق اس سال کے وسط تک ہندوستان میں چین سے تقریباً 2.9 ملین زیادہ لوگ ہوں گے۔
اقوام متحدہ کے اندازوں کے مطابق ہندوستان کی آبادی تقریباً 1.4286 بلین ہو گی جبکہ چین کی آبادی 1.4257 بلین ہو گی، تاہم آبادی کے اعداد و شمار کی حدود کی وجہ سے درست تاریخ کا حساب لگانا ناممکن ہو جاتا ہے اس لیے کہ ڈیموگرافروں کا کہنا ہے کہ بھارت نے 2011 سے مردم شماری نہیں کرائی ہے۔
بہت سے لوگوں کا خیال ہے کہ ہندوستان کی نوجوان اور بڑھتی ہوئی آبادی آنے والے سالوں میں ملک کی اقتصادی ترقی کا باعث بنے گی، ہندوستان کی 254 ملین آبادی 15 سے 24 سال کی عمر کے لوگوں پر مشتمل ہے اور اس اعدادوشمار کے ساتھ ہندوستان دنیا کا سب سے کم عمر ملک ہے۔
دریں اثنا چین بڑھتی عمر اور آبادی کے جمود سے نبرد آزما ہے جبکہ جاری کردہ اعداد و شمار سے توقع ہے کہ آبادیاتی تبدیلیاں ہندوستان کے لیے اقتصادی اور عالمی ہیوی ویٹ بننے کی راہ ہموار کر سکتی ہیں۔
