ٹرمپ کے دوسرے دور کے پہلے 100 دن؛ داخلی کشمکش اور عالمی محاذ آرائی

امریکہ میں ڈونلڈ ٹرمپ کی دوسری مدت صدارت کے ابتدائی 100 دنوں میں داخلی سطح پر بڑی تبدیلیوں، سخت امیگریشن اقدامات، تجارتی بحرانوں اور عالمی سطح پر متحرک پالیسیوں کا مشاہدہ کیا گیا۔

29 اپریل 2025 کو، ٹرمپ کی دوسری صدارت نے 100 دن مکمل کیے۔ یہ مدت تیز رفتار تبدیلیوں اور داخلی و خارجی میدانوں میں جارحانہ اقدامات سے عبارت رہی۔

ٹرمپ نے ایک نئے ایگزیکٹو آرڈر کے ذریعے وفاقی اداروں میں اعلیٰ عہدوں پر فائز اُن ملازمین کو برطرف کرنے کا اختیار حاصل کیا جو حکومتی پالیسیوں سے ہم آہنگ نہیں تھے۔ ہزاروں اہلکار وزارت انصاف، وزارت خارجہ، وزارت تعلیم اور سیکیورٹی ایجنسیوں سے برطرف یا تبدیل کر دیے گئے۔ اب کلیدی عہدوں پر برقرار رہنے کے لیے سرکاری ملازمین کو صدر کی پالیسیوں سے کھلی حمایت کا اظہار کرنا لازم قرار دیا گیا۔

ٹرمپ نے میکسیکو کے ساتھ سرحد پر دیوار کی تعمیر کو دوبارہ تیز کر دیا اور اس مقصد کے لیے بھاری بجٹ مختص کیا۔ سیکورٹی فورسز اور جدید نگرانی کے آلات جیسے ڈرونز اور تھرمل کیمرے سرحد پر تعینات کیے گئے۔ نئی پالیسیوں کے تحت، پناہ گزینوں کو امریکہ میں داخلے سے قبل کسی تیسرے محفوظ ملک میں طویل انتظار کرنا پڑتا۔ امریکہ میں پناہ کے مواقع کی سالانہ تعداد کو بھی کم کر دیا گیا۔

ٹرمپ نے ٹیکس میں کمی اور صنعتی مراعات کے ساتھ معاشی سرگرمیوں کو تیز کرنے کی کوشش کی، لیکن ساتھ ہی تقریباً 70 ممالک پر بھاری تجارتی محصولات عائد کر دیں۔ چین، میکسیکو، کینیڈا اور یورپی شراکت داروں کے ساتھ تجارتی تعلقات متاثر ہوئے۔ نتیجتاً، صنعتی شعبے مہنگے خام مال اور کمزور برآمدات کی وجہ سے دباؤ کا شکار ہو گئے۔ مہنگائی میں اضافہ ہوا، دیہی معیشتیں کمزور ہوئیں اور زرعی برآمدات متاثر ہوئیں۔

ٹرمپ نے امریکی تاریخ میں 1970 کے بعد بدترین 100 دنوں کی مارکیٹ کارکردگی کا ریکارڈ اپنے نام کیا۔ اسٹاک مارکیٹ انڈیکس S&P 500 میں 7.9 فیصد کمی ہوئی، جو کہ صرف رچرڈ نکسن کے 9.9 فیصد زوال سے بہتر تھی۔

"امریکہ فرسٹ” کے نعرے کی پاسداری کرتے ہوئے، ٹرمپ نے چین پر دباؤ بڑھایا، ایران کے ساتھ بالواسطہ مذاکرات شروع کیے، اور یوکرین کی فوجی امداد کو مشروط کر دیا۔ وہ مغربی نصف کرہ میں امریکی بالادستی کو مزید وسعت دینے کے لئے جارحانہ منصوبے ترتیب دیتے رہے۔

ٹرمپ کا دوسرا دور ایک ایسی حکمت عملی پر مبنی ہے جس میں اندرونی اداروں پر کنٹرول، سخت قومی پالیسیاں اور بین الاقوامی سطح پر جارحانہ طرزعمل نمایاں ہیں۔ تاہم، معاشی دباؤ اور بڑھتی ہوئی سماجی ناہمواری ان کی پالیسیوں کے بڑے چیلنجز کے طور پر ابھرے ہیں۔

ڈونلڈ ٹرمپ کے دوسرے دور صدارت کے پہلے 100 دنوں میں امریکہ نے اپنی خارجہ پالیسی میں کئی اہم اور متنازع اقدامات اٹھائے۔ ان اقدامات میں یوکرین کی حمایت میں کمی، ایران سے خفیہ مذاکرات، چین کے خلاف تجارتی جنگ، نیٹو سے تعلقات میں سردمہری اور پاناما، کینیڈا اور گرین لینڈ کو امریکی دائرہ اثر میں لانے کی کوشش شامل ہیں۔

ٹرمپ نے اپنی صدارت کے آغاز میں یوکرین کے صدر ولودیمیر زیلنسکی پر جنگ بندی قبول کرنے کے لیے دباؤ ڈالا۔ انہوں نے واضح طور پر کہا کہ امریکہ، جب تک یورپی یونین یوکرین کی مدد میں زیادہ حصہ نہ لے، اپنی فوجی اور مالی امداد معطل کرے گا۔

اس اقدام سے کیف حکومت تذبذب کا شکار ہوئی اور یورپی اتحادیوں پر دباؤ بڑھ گیا۔ ساتھ ہی ساتھ، ٹرمپ نے یوکرین کے معدنی وسائل پر 500 ارب ڈالر کے معاہدے کی کوششیں بھی شروع کیں۔

ابتدائی سخت موقف کے باوجود، ٹرمپ حکومت نے ایران کے ساتھ خفیہ مذاکرات کا آغاز کیا۔ عمان اور روم میں تین دور خفیہ ملاقاتیں ہوئیں، جن میں بنیادی توجہ ایران پر عائد ظالمانہ پابندیوں کے خاتمے اور جوہری مسئلے پر تھی۔

چوتھے دور کا آغاز آئندہ ہفتے مسقط میں متوقع ہے، جسے مکمل رازداری میں رکھا جا رہا ہے۔ مذاکرات میں مثبت پیش رفت کی اطلاعات موصول ہو رہی ہیں۔

اقتصادی دباؤ کے باعث، ٹرمپ نے یورپ، کینیڈا، میکسیکو اور جنوبی کوریا پر عائد محصولات ختم کرنے کا فیصلہ کیا۔ تاہم، چین کے خلاف محصولات میں مزید اضافہ کیا گیا، جس کے نتیجے میں چین نے بھی امریکی مصنوعات پر جوابی محصولات لگا دیے۔

ٹرمپ نے نیٹو کے دفاعی اخراجات پر تنقید کرتے ہوئے دھمکی دی کہ اگر رکن ممالک اپنے دفاعی بجٹ کو مجموعی قومی پیداوار کے 2 فیصد تک نہ بڑھائیں تو امریکہ اپنی یورپی فوجی موجودگی کم کر دے گا۔

اس پالیسی نے امریکہ اور یورپ کے درمیان نیا تناؤ پیدا کیا۔ جرمنی کے صدر فرینک والٹر اشٹائن مائر نے اعلان کیا کہ جرمنی یورپی دفاع کا اہم ستون بنے گا۔

ٹرمپ نے اپنے ابتدائی 100 دنوں میں ایک عظیم منصوبہ پیش کیا، جس کے تحت کینیڈا، گرین لینڈ اور پاناما کو امریکی دائرہ اختیار میں لانے کی کوشش کی گئی۔

کینیڈا میں خفیہ مذاکرات اور گرین لینڈ کے قطبی علاقوں کے حصول کی کوششیں جاری رہیں، جبکہ پاناما میں بڑی انفراسٹرکچر ڈیلز کی پیشکش کی گئی تاکہ پاناما کینال پر امریکہ کا مکمل کنٹرول قائم کیا جا سکے۔

اگرچہ ان ممالک میں مخالفت موجود ہے، لیکن ٹرمپ نے اس عمل کو "اختیاری انضمام” قرار دیا جبکہ عالمی مبصرین اسے زبردستی کا الحاق سمجھتے ہیں۔

سی این این کی تازہ ترین رائے شماری کے مطابق، ٹرمپ کی مقبولیت اپنی کم ترین سطح پر ہے۔

اخبار گارڈین نے لکھا کہ ٹرمپ نے ثابت کر دیا کہ ان کا دوسرا دور حکومت امریکی تاریخ کا بدترین دور ہوگا۔

گارڈین نے مزید نشاندہی کی کہ ٹرمپ کی پالیسیاں، بالخصوص جمہوریت اور آئین کے خلاف جنگ، جیسے کہ عدالتی احکامات کی خلاف ورزی، غیرقانونی برطرفیاں، تیسری مدت کے لیے نامزدگی کی تجاویز، ججوں کا مواخذہ، اور فوجی لائبریریوں میں کتابوں پر پابندیاں، امریکہ کے سیاسی ڈھانچے کو خطرے میں ڈال رہی ہیں۔