بے اولاد ہونے کے باوجود کبھی شکوہ نہیں کیا، حنا بیات خان

?️ 29 مارچ 2024

کراچی: (سچ خبریں) سینیئر اداکارہ حنا بیات خان نے بےاولادی پر گفتگو کرتے ہوئے کہا ہے کہ انہیں اور ان کے شوہر کو بچے پسند ہیں لیکن انہوں نے کبھی ایک دوسرے کو اولاد ہونے کا الزام نہیں لگایا، اداکارہ نے کہا کہ اولاد نہ ہونے کے پیچھے اللہ کی کوئی مصلحت ہوگی۔

حنا بیات خان نے حال ہی میں مدیحہ رحمٰن کو انٹرویو دیا جہاں انہوں نے بےاولادی سمیت مختلف موضوعات پر گفتگو کی۔

انٹرویو کے ایک وائرل کلپ میں اداکارہ نے کہا کہ کچھ چیزیں اللہ کی طرف سے ہوتی ہیں، ہم دونوں نے کبھی اولاد نہ ہونے پر ایک دوسرے کو الزام نہیں دیا۔

ان کا کہنا تھا کہ ’ہم دونوں نے اپنی طرف سے کوشش کی، کئی علاج کروائے، متعدد بار حاملہ بھی ہوئی لیکن حمل ضائع ہوگئے پھر ہم سمجھ گئے کہ اللّٰہ ہمیں اولاد نہیں دینا چاہتا اور اس کے ہر کام میں کوئی نہ کوئی مصلحت ہوتی ہے۔

حنا بیات نے کہا کہ انہوں نے صرف دعا کی ہے کہ اگر اللہ انہیں اولاد سے نوازے تو وہ نارمل اور صحت مند ہو۔

انہوں نے کہا کہ ’ہم دونوں میاں بیوی ہی ایک دوسرے کے لیے کافی تھے بس کبھی کبھی میں سوچتی ہوں کہ اگر آج میرے بچے ہوتے تو شاید مجھے تھوڑا سہارا ہوتا اور تنہائی محسوس نہیں ہوتی لیکن میں یہ بھی سوچتی ہوں کہ اگر آج بچے ہوتے تو مجھ پر ذمہ داریاں بھی ہوتیں اس لیے شاید یہ اللّٰہ کا کرم ہے کہ اس نے مجھ پر اس ذمہ داری کا بوجھ نہیں ڈالا‘۔

اداکارہ نے کہا کہ ان کے آن اسکرین اور آف اسکرین بہت سارے بچے ہیں، اور وکی پیڈیا کے مطابق میرے دو بچے ہیں جن کے نام عثمان خالد بٹ اور مدیحہ امام ہیں۔

گفتگو کے آخر میں حنا خواجہ بیات نے کہا کہ اللّٰہ جو بھی کرتا ہے وہ انسان کی بہتری کے لیے ہوتا ہے اور انسان کو بعد میں سمجھ آتی ہے کہ اللّٰہ نے اسے کتنی بڑی مشکل سے بچا لیا۔