گھڑدوڑ کی جگہ خواتین کے جلوے بنے توجہ کا مرکز

?️ 23 فروری 2021

ریاض {سچ خبریں} دنیا میں متعدد کھیل ہیں جن کا کسی نہ کسی ملک میں فیسٹیول ہوتا ہے۔ جیسے آج کل پاکستان ہی میں لے لیجئے وہاں پی ایس ایل ۶ چل رہا ہے۔ اسی طرح بھارت میں آئی پل ایل ہوتا ہے تو ہر ملک میں کوئی نہ کوئی کھیل ہوتا ہی ہے۔ سعودی عرب میں بھی ہر سال دنیا کے مہنگے ترین مقابلے گھڑدوڑ کا انعقاد کیا جاتا ہے۔ لیکن اس سال اس مہنگے مقابلے کی جگہ خواتین کے جلوے توجہ کا مرکز بنے۔

سعودی عرب کے اخبار ’سعودی گزٹ‘ کے مطابق دنیا کے مہنگے ترین گھڑدوڑ ایونٹ کے مقابلے 20 سے 21 فروری تک جاری رہے اور مقابلے کے آخر میں حیران کن طور پر سعودی عرب کے گھوڑے نے امریکی گھوڑے کو شکست دے دی۔

’سعود کپ‘ کے نام سے ہونے والی اس گھڑ ریس میں سعودی عرب اور امریکا سمیت دیگر یورپی و خلیجی ممالک کے گھڑ سواروں نے مقابلے میں حصہ لیا۔ گھڑ ریس میں امریکی گھوڑے ’شارلٹن کو فیورٹ سمجھا جا رہا تھا اور خیال کیا جا رہا تھا کہ وہی فائنل جیتے گا، تاہم حیران کن طور پر اسے سعودی عرب کے گھوڑے نے شکست دے دی۔

مقابلے جیتنے والے گھڑ سوار کو سعودی ولی عہد نے 2 کروڑ ڈالر کی نقد رقم اور ایوارڈ سے نوازا۔تاہم دنیا کے مہنگے ترین گھڑ دوڑ مقابلے میں اس بار گھوڑوں کی ریس سے زیادہ عرب خواتین کے جلوے توجہ کا مرکز رہے اور خواتین نے بھی گھڑ ریس سے موقع اٹھاتے ہوئے نت نئے فیشن متعارف کرادیے۔

اگرچہ اب سعودی عرب میں مرد و خواتین کے مشترکہ اسپورٹس، فیشن اور شوبز ایونٹس بھی ہوتے ہیں، تاہم پہلی بار سعودی کپ میں خواتین کی بہت بڑی تعداد نے نہ صرف شرکت کی بلکہ اس بار خواتین نے گھڑ ریس کے دوران فیشنی ملبوسات بھی متعارف کرائے۔