بھارت جیلوں میں قید کشمیری حریت رہنماؤں کی زندگیوں کو شدید خطرات لاحق ہیں

?️ 26 اپریل 2021

سرینگر (سچ خبریں) ایک طرف جہاں بھارت میں کورونا وائرس کی شدید لہر جاری ہے وہیں بھارتی جیلوں میں کشمیری رہنماؤں کی زندگیوں کو شدید خطرات لاحق ہیں اور بعض رہنما متعدد بیماریوں میں مبتلا ہیں لیکن بھرت کی جانب سے انہیں کسی قسم کی طبی امداد فراہم نہیں کی جا رہی ہیں۔

موصولہ اطلاعات کے مطابق کشمیر میڈیا سروس کی طرف سے جاری کی گئی ایک رپورٹ میں کہا گیا ہے کہ 3 ہزار سے زائد حریت رہنما اور کارکن بھارت کی مختلف جیلوں بشمول دہلی کی بدنام زمانہ تہاڑ جیل میں اس بات کے باوجود بند رکھے گئے ہیں کہ انہیں بڑھتی ہوئی کورونا وبا سے شدید خطرہ لاحق ہے اور وہ مختلف عارضوں میں مبتلا ہیں۔

رپورٹ میں کہا گیا ہے ان نظربند رہنمائوں میں محمد یاسین ملک، محمد اشرف صحرائی، شبیر احمد شاہ، مسرت عالم بٹ، ڈاکٹر عبدالحمید فیاض اور آسیہ اندرابی شامل ہیں جنہیں مختلف جھوٹے مقدمات میں پھنسایا گیا ہے۔

دریں اثنا مقبوضہ کشمیر میں کل جماعتی حریت کانفرنس نے اقوام متحدہ اور دیگر عالمی اداروں سے اپیل کی ہے کہ وہ مقبوضہ علاقے میں کشمیری عوام کی نسل کشی روکنے کے لئے ٹھوس اقدامات کریں۔

کشمیرمیڈیا سروس کے مطابق کل جماعتی حریت کانفرنس کے ورکنگ وائس چیئرمین غلام احمد گلزار نے سرینگر میں جاری ایک بیان میں کہا کہ بھارت ظالمانہ ہتھکنڈے استعمال کرکے کشمیری عوام کو حق خود ارادیت کے حصول کی جدوجہد سے بار رکھنا چاہتا ہے لیکن جموں و کشمیر کے عوام نے عزم کررکھا ہے کہ وہ منزل مقصود کے حصول تک اپنی جدوجہد جاری رکھیں گے۔

حریت رہنماؤں خواجہ فردوس، خادم حسین، انسانی حقوق کے کارکن محمد احسن انتو، میر واعظ کی سرپرستی میں قائم حریت فورم، جموں و کشمیر ایمپلائز موومنٹ اور کشمیر کونسل یورپ کے چیئرمین علی رضا سید نے اپنے بیانات میں بڑھتے ہوئے کورونا کیسز کے باعث جیلوں میں نظربند کشمیریوں کی زندگیوں کو لاحق خطرات پرشدید تشویش کا اظہار کیا ہے۔

کل جماعتی حریت کانفرنس کے سینئر رہنما اورجموں و کشمیر ڈیموکریٹک فریڈم پارٹی کے سربراہ شبیراحمد شاہ کی بیٹی سحر شبیر شاہ نے اپنے والد اور دیگر کشمیری نظربندوں کی رہائی کے لئے ایک آن لائن مہم شروع کردی ہے۔

سحر شبیر نے کہا کہ میں جیل میں جب بھی اپنے والد سے ملتی ہوں، ان کا عزم پہلے سے بہت مضبوط پاتی ہوں، انہوں نے کہا کہ جیل کی سختیوں کے باوجود وہ اپنے موقف پر چٹان کی طرح قائم ہیں۔

پیپلز ڈیموکریٹک پارٹی نے ایک بیان میں مودی حکومت پر زوردیا ہے کہ وہ انتقامی رویہ ترک کرکے جیلوں میں نظربند کشمیری سیاسی قیدیوں کو رہاکرے۔

پی ڈی پی نے کہا کہ جب کورونا کی وبا پورے بھارت میں تباہی مچا رہی ہے،ہم یہ سمجھنے سے قاصر ہیں کہ بھارتی حکومت کو مقبوضہ جموں و کشمیر اور بھارت کی مختلف جیلوں میں سیاسی قیدیوں کی غیر انسانی اور غیر قانونی نظربندی سے کیا خوشی ملتی ہے۔