انسانی حقوق کی بین الاقوامی تنظیمیں کشمیری رہنماؤں کی رہائی کے لیئے عملی قدم اٹھائیں: جموں کشمیر مسلم لیگ

?️ 12 مارچ 2021

سرینگر (سچ خبریں) مقبوضہ کشمیر میں جموں و کشمیر مسلم لیگ نے عالمی تنظیموں سے مطالبہ کیا ہے کہ انسانی حقوق کی بین الاقوامی تنظیمیں کشمیری رہنماؤں کی رہائی کے لیئے عملہ قدم اٹھائیں۔

تفصیلات کے مطابق مقبوضہ کشمیر میں جموں و کشمیر مسلم لیگ کے قائم مقام چیئرمین عبدالاحد پرہ نے انسانی حقوق کی بین الاقوامی تنظیموں سے اپیل کی ہے کہ وہ تمام کشمیری نظربندوں کی رہائی کیلئے بھارت پر دبائو بڑھائیں۔

کشمیرمیڈیاسروس کے مطابق عبدالاحد پرہ نے سرینگر سے جاری ایک بیان میں بھارت اور مقبوضہ علاقے کی مختلف جیلوں میں نظربند حریت رہنمائوں محمد اشرف صحرائی، محمد یاسین ملک، شبیر احمد شاہ، ایاز محمد اکبر، پیر سیف اللہ، الطاف احمد شاہ، آسیہ اندرابی، محمد یوسف میر، نعیم احمدخان، فاروق احمد توحیدی، محمد رفیق گنائی، شوکت حکیم، حیات احمد بٹ، معراج الدین نندا، وحید احمد گوجری، محمد یوسف بٹ، محمد یوسف فلاحی، امیر حمزہ ، ڈاکٹر محمد شفیع شریعتی، ڈاکٹر قاسم فکتو ، شاہد الاسلام ، فاروق احمد ڈار ، غلام محمد بٹ ،فیروز احمد ڈار ، محمد اقبال وانی ، عادل زرگر، دائو زرگر، ظہور احمد پرے، سہیل پرے، رمیض احمد، عاشق خواجہ، امتیاز حیدر اور دیگر کو بدترین سیاسی انتقام کا نشانہ بنایا جارہا ہے۔

انہوں نے کہا کہ کشمیری نظربندوں کو جیلوں میں علاج معالجے اور مناسب خوراک سمیت تمام بنیادی سہولتوں سے محروم رکھا جارہا ہے۔

عبدالاحد پرہ نے عالمی برادری اور انسانی حقوق کی بین الاقوامی تنظیموں سے اپیل کی کہ وہ اقوام متحدہ کی قراردادوں کے مطابق تنازعہ کشمیر کے حل اور کشمیری نظربندوں کی رہائی کیلئے اپنا کردار ادا کریں۔