سرینگر (سچ خبریں) مقبوضہ کشمیر میں معروف نوجوان کشمیری رہنما اور مجاہد شہید برہان مظفر وانی اور ان کے دو ساتھیوں کے پانچویں یوم شہادت کے موقع پر آج مقبوضہ کشمیر میں مکمل ہڑتال کی گئی۔
تفصیلات کے مطابق مقبوضہ کشمیر میں معروف کشمیری مجاہد اور رہنما شہید برہان مظفر وانی کی شہادت کی پانچویں برسی پر جمعرات کو مکمل ہڑتال کی گئی جبکہ وادی بھر میں بھارتی انتظامیہ کی جانب سے سخت کرفیو اور حفاظتی انتظامات کیئے گئے تھے۔
کشمیر میڈیاسروس کے مطابق ہڑتال کی کال کل جماعتی حریت کانفرنس نے دی ہے جبکہ دیگر حریت تنظیموں نے اس کی حمایت کی ہے، دکانیں اور کاروباری ادارے بند جبکہ سڑکوں پر ٹریفک کی آمد ورفت محدود ہے۔
بھارتی فوجیوں نے برہان وانی کو 2016 میں آج کے روز ضلع اسلام آباد کے علاقے ککر ناگ میں ایک جعلی مقابلے میں شہید کردیا تھا۔
ان کے ماورائے عدالت قتل پر مقبوضہ علاقے میں کئی ماہ تک ایک زبردست انتفاضہ چلا تھا جس دوران بھارتی فوجیوں اور پولیس اہلکاروں کی طرف بھارت مخالف مظاہرین پر طاقت کے وحشیانہ استعمال کے نتیجے میں 120 سے زائد کشمیری نوجوان شہید ہو گئے تھے۔
دریں اثنا شہید رہنما کی برسی پر آج سرینگر میں بھارت کے خلاف اور آزادی کے حق میں مظاہرہ کیا گیا، جموں و کشمیر صدائے مظلوم کے کارکنو ں اور بچوں سمیت مظاہرے میں بڑی تعداد میں لوگ شریک تھے، مظاہرین نے برہان وانی کی تصاویر والے بینر اٹھا رکھے تھے، انہوں نے برہان وانی اور آزادی کے حق میں نعرے لگائے۔