پوسٹروں میں کشمیریوں سے 27اکتوبر کو یوم سیاہ کے طور پر منانے کی اپیل

?️ 20 اکتوبر 2025

سرینگر: (سچ خبریں) غیر قانونی طور پر بھارت کے زیر قبضہ جموں و کشمیر کے مختلف علاقوں میں پوسٹرچسپاں کئے گئے ہیں جن میں لوگوں سے اپیل کی گئی ہے کہ وہ بھارت کے غیر قانونی قبضے کے خلاف احتجاج کے لئے 27اکتوبر کو یوم سیاہ منائیں۔

کشمیر میڈیا سروس کے مطابق بھارت نے 1947میں اسی دن کشمیری عوام کی مرضی کے بر خلاف جموں وکشمیرمیں اپنی فوجیں اتاریں اور علاقے پر جابرانہ قبضہ کیاتھا۔سرینگر اور دیگر علاقوں میں دیواروں، عمارتوں اور بجلی کے کھمبوں پر چسپاں کیے گئے پوسٹروں میں کہاگیا ہے کہ کشمیری اس وقت تک اپنی جدوجہد جاری رکھیں گے جب تک وہ اقوام متحدہ کی طرف سے تسلیم شدہ حق خود ارادیت حاصل نہیں کر لیتے۔

پوسٹروں میں 27اکتوبر 1947کو جموں و کشمیر کی تاریخ کا سیاہ ترین دن قرار دیا گیا ہے۔پوسٹروںمیں کہا گیا کہ بھارت کشمیری قیادت کو جدوجہد آزادی سے دستبردار کرانے کے لیے جابرانہ ہتھکنڈے استعمال کر رہا ہے لیکن وہ اپنے مذموم عزائم میں کبھی کامیاب نہیں ہو گا۔ پوسٹروں میں کنٹرول لائن کے دونوں اطراف اوردنیا بھر میں مقیم کشمیریوں سے اپیل کی گئی ہے کہ وہ 27اکتوبر کو یوم سیاہ منا کر بی جے پی-آر ایس ایس حکومت کے ہندوتوا ایجنڈے کے خلاف متحد ہو جائیں۔

پوسٹروں میں غیر کشمیریوں کو ڈومیسائل سرٹیفکیٹ جاری کرنے، سرکاری عہدوں سے مسلمان ملازمین کو برطرف کرنے اور خطے کی اسلامی ثقافت کو مٹانے اور ہندوتوا نظریے کو فروغ دینے کے لیے تعلیمی نصاب میں تبدیلیوں کی شدید مذمت کی گئی جن کا مقصدخطے میں آبادی کا تناسب تبدیل کرنا ہے۔پوسٹروں میں خبردارکیاگیا ہے کہ مقبوضہ جموں و کشمیر کی مسلم شناخت کو تبدیل کرنے کے لیے ایک وسیع ثقافتی یلغار اور سیاسی حکمت عملی کے تحت مختلف مقامات پر ہندو مذہبی نشانات اور مجسمے نصب کیے جا رہے ہیں۔پوسٹروں کو ٹویٹر، فیس بک اور واٹس ایپ جیسے سوشل میڈیا پلیٹ فارمز پر بھی شیئر کیا جارہاہے۔