مقبوضہ کشمیر کا نام تبدیل کرنے کے بھارتی وزیرداخلہ کے بیان کی شدید مذمت

🗓️ 3 جنوری 2025

اسلام آباد: (سچ خبریں) کل جماعتی حریت کانفرنس آزاد جموں و کشمیر شاخ کے سینئر رہنما محمد فاروق رحمانی نے بھارتی وزیر داخلہ امیت شاہ کی جانب سے مقبوضہ جموں وکشمیر کا نام مہارشی کشیپ رکھنے کے مذموم اور افسوسناک بیان کی مذمت کی ہے۔

کشمیرمیڈیاسروس کے مطابق محمد فاروق رحمانی نے اسلام آباد میں جاری ایک بیان میں کہا کہ ہندوتوا ذہنیت کے حامل بھارتی لیڈر وں اور حکمرانوں اپنے مندروں میں ہندو دیوی اور دیوتاؤں کوضرور خوش کریں لیکن انہیں صدیوں پرانی کشمیر کی غیر فرقہ وارانہ اور سیکولر ثقافت اور روایات کو اپنے مذموم سیاسی مقاصد اور عزائم کو پورا کرنے کے لیے مسخ کرنے سے باز رہنا چاہیے۔

انہوں نے کہا کہ بھارت کے ہندوتوا حکمران ہندوتوانظریات پر یقین رکھتے ہیں اور کشمیر کے ہزاروں سال پرانی تاریخی روایات کو نقصان پہنچانا چاہتے ہیں جو اتحاد کی علامت ہیں۔فاروق رحمانی نے تشویش ظاہر کی کہ ہندوتوا حکمران دیوی ، دیوتائواں، گائے ، سانپ اورآگ کی پوجا کرنے غلط تایخی حوالوں اور تشریحات کی بنیاد پر کشمیری عوام میں انتشار پیدا کر رہے ہیں جبکہ ان کا بنیادی منصوبہ جموں و کشمیر سے اسلام کو جڑ سے اکھاڑ پھینکناہے ۔

انہوں نے تمام سیاسی جماعتوں اور مسلم اور غیر مسلم کمیونٹی کے رہنماؤں پر زور دیا کہ وہ متحدہوکرجموں و کشمیر کی تاریخ اور مذہبی اتحاد اور یکجہتی کے خلاف بھارتی لیڈروں کے مذموم عزائم کو ناکام بنائیں۔انہوں نے اقوام متحدہ کے سکریٹری جنرل سے بھی اپیل کی کہ وہ جموںو کشمیر کا نام بدلنے اور دنیا کے نقشے سے "کشمیر” کو مٹانے کے بھارتی ہندوتواحکمرانوں کے مذموم عزائم کافوری نوٹس لیں۔