مقبوضہ جموں و کشمیر کی سنگین صورتحال کی طرف فوری توجہ نہ دی گئی تویہ قابو سے باہر ہو جائے گی: حریت کانفرنس

?️ 21 دسمبر 2025

سرینگر: (سچ خبریں) غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے خبردار کیا ہے کہ اگرعالمی برادری نے مقبوضہ جموں و کشمیر کی سنگین صورتحال کی طرف فوری توجہ نہ دی تویہ قابو سے باہر ہو جائے گی۔

کشمیرمیڈیاسروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں کہا کہ مودی حکومت کشمیریوں کی جائز جدوجہد آزادی کو طاقت کے وحشیانہ استعمال سے کچلنے پر تلی ہوئی ہے۔

انہوں نے کہاکہ تنازعہ کشمیر جنوبی ایشیا میں ایک خطرناک ایٹمی فلیش پوائنٹ بنا ہواہے او ر بین الاقوامی کارروائی کے لئے وقت ختم ہوتا رہا ہے۔ انہوں نے کہاکہ تنازعہ کشمیر کو نظر انداز کرنا کسی کے مفادمیں نہیں ہے کیونکہ مسئلے کے حل میں مسلسل تاخیرکے سنگین عالمی نتائج ہونگے۔

ایڈوکیٹ منہاس نے کہا کہ کشمیر بھارت کا اندرونی معاملہ نہیں بلکہ جنوبی ایشیا میں ایک جوہری فلیش پوائنٹ ہے۔ انہوں نے خبردار کیا کہ مودی حکومت کی فوجی پالیسیاں علاقائی امن کو شدید خطرات سے دوچار کر رہی ہیں اور مسئلہ کشمیر کوحل نہ کرنے سے ایٹمی بحران جنم لے سکتا ہے۔

انہوں نے اقوام متحدہ اور عالمی برادری سے مطالبہ کیا کہ وہ مسئلہ کشمیر کے حل اور ممکنہ علاقائی تباہی کو روکنے کے لیے فوری مداخلت کریں۔انہوں نے افسوس کا اظہار کیا کہ بھارت استصواب رائے کے جائز مطالبے کو دبانے کے لیے کشمیر کے مظلوم عوام کے خلاف ظالمانہ قوانین اورطاقت پر مبنی پالیسیاں استعمال کر رہا ہے۔

ترجمان نے کہا کہ بھارتی فوج، پیراملٹری فورسز اور پولیس اہلکار جنہیں آرمڈ فورسزا سپیشل پاورز ایکٹ، ڈسٹربڈ ایریاز ایکٹ، پبلک سیفٹی ایکٹ اور غیر قانونی سرگرمیوں کی روک تھام کے ایکٹ سمیت کالے قوانین کے تحت بے پناہ ختیارات حاصل ہیں، کشمیریوں کو ڈرانے دھمکانے کے لیے جنگی جرائم کا ارتکاب کر رہے ہیں جو انسانیت کے خلاف جرائم ہیں۔

انہوں نے کہا کہ بھارتی فورسز مکمل استثنیٰ کے ساتھ انسانی حقوق کی سنگین خلاف ورزیاں کررہی ہیں جن میں ماورائے عدالت قتل، من مانی گرفتاریاں، تشدد، محاصرے اور تلاشی کی کارروائیاں، گھروں پر چھاپے، جائیدادوں پر قبضے اور خواتین کی بے حرمتی شامل ہیں۔ ترجمان نے کہاکہ ان کارروائیوں کا مقصد مقبوضہ جموں و کشمیر کے عوام میں خوف ودہشت پھیلانا ہے۔