بھارتی فورسز نے نہتے کشمیریوں پر مظالم میں تیزی لائی ہے، حریت کانفرنس آزادکشمیر شاخ

?️ 28 نومبر 2024

اسلام آباد: (سچ خبریں) کل جماعتی حریت کانفرنس آزاد جموں وکشمیر شاخ نے بھارت کے غیر قانونی زیر قبضہ جموں وکشمیر میں بھارتی فورسز کی طرف سے محاصرے اور تلاشی کی بڑھتی ہوئی کارروائیوں اور بے گناہ نوجوانوں کی گرفتاری کی شدید مذمت ہے۔

کشمیر میڈیاسروس کے مطابق حریت کانفرنس آزاد جموں و کشمیر شاخ کے جنرل سیکرٹری ایڈووکیٹ پرویز شاہ اور سینئر رہنماﺅں محمد فاروق رحمانی اور محمود احمد ساغر نے اسلام آباد سے جاری اپنے بیانات میں کہا کہ بھارتی فورسز نے مقبوضہ علاقے میں اپنے مظالم میں تیزی لائی ہے اور وہ کشمیریوں کو تحریک آزادی سے باز رکھنے کیلئے انتہائی وحشیانہ ہتھکنڈے استعمال کر رہی ہیں۔

انہوں نے کہا کہ قابض فورسز نے مقبوضہ علاقے کے کئی اضلاع میں محاصرے اور تلاشی کی پرتشدد کارروائیاں شروع کر رکھی ہیں، قابض بھارتی اہلکار ان کارروائیوں کے دوران گھروں میں گھس کر مکینوں کو سخت ہراساں اور گھریلو اشیاءکی توڑ پھوڑ کے علاوہ بے گناہ نوجوانوں کوگرفتار کر لیتے ہیں، بھارتی فورسز نے گزشتہ چند روز کے دوران راجوری، پونچھ، ادھم پور، ریاسی ، ڈوڈہ کے اضلاع سے درجنوں نوجوان گرفتار کر لیے ہیں۔

بھارتی فورسز نے مقبوضہ علاقے میں اپنے مظالم میں تیزی لائی ہے اور وہ کشمیریوں کو تحریک آزادی سے باز رکھنے کیلئے انتہائی وحشیانہ ہتھکنڈے استعمال کر رہی ہیں۔

کل جماعتی حریت کانفرنس آزاد جموں وکشمیر شاخ کے رہنماﺅں نے کہا کہ بھارت جبر و ستم کے ہتھکنڈوں کے ذریعے کشمیریوں کے جذبہ آزادی کو دبانے کی کوشش کر رہا ہے لیکن وہ اپنے مذموم منصوبے میں کبھی کامیاب نہیں ہوگا۔ انہوںنے عالمی برادری سے مطالبہ کیا ہے کہ وہ نہتے کشمیریوں پر مظالم کے خاتمے اور تنازعہ کشمیر کے حل کیلئے بھارت پر دباﺅ ڈالے۔