امریکی فیشن ڈیزائنر خدیجہ شاہ نے امریکی شہریت کیوں ترک کر دی؟

?️ 1 اگست 2024

سچ خبریں: 9 مئی کے واقعات میں ملوث ہونے کے الزام میں جیل کاٹنے والی پی ٹی آئی کارکن اور امریکی فیشن ڈیزائنر خدیجہ شاہ نے بانیٔ پی ٹی آئی کی پیشکش قبول کرتے ہوئے اپنی امریکی شہریت کو خیرآباد کہنے کا اعلان کیا ہے۔

خدیجہ شاہ نے انسٹاگرام پر ایک طویل نوٹ شیئر کرتے ہوئے کہا کہ ان کے لیے امریکی شہریت ترک کرنے کا فیصلہ ان کے لیے آسان نہیں تھا اس لیے کہ اس ملک کی شہریت آزادی، حفاظت اور زندگی میں آگے بڑھنے کے مواقع فراہم کرتی ہے۔

یہ بھی پڑھیں:9 مئی سے متعلق ایک اور مقدمہ: لاہور پولیس کو خدیجہ شاہ سے پوچھ گچھ کی اجازت

انہوں نے مزید لکھا کہ پاکستان میرا وطن ہے، وہ جگہ ہے جسے میں اپنا گھر کہتی ہوں، میں نے یہاں اپنی زندگی بنائی ہے اور اپنے ملک اور لوگوں سے دستبردار نہیں ہو سکتی۔

خدیجہ شاہ کا کہنا تھا کہ گزشتہ ڈیڑھ سال کے دوران انہوں نے ذاتی طور پر ناقابل تصور ناانصافیوں کا سامنا کیا لیکن ان مصیبتوں نے ان کے اندر مقصد کو جاننے کا احساس پیدا کیا ہے، وہ پاکستان میں تبدیلی لانے کی خواہش کے ساتھ آگے بڑھی ہیں۔

9 مئی کے پر تشدد واقعات میں نامزد ہو کر طویل مدت تک جیل کاٹنے والی خدیجہ شاہ نے کہا کہ انہیں فخر ہے کہ چیئرمین پی ٹی آئی اور ان کے ہیرو عمران خان نے انہیں پارٹی کی نمائندگی کرنے اور پاکستان کے لیے اپنے وژن کا حصہ بننے کے قابل سمجھا ہے۔

انہوں نے عمران خان کی مخصوص نشست کی پیشکش قبول کر لی ہے اور امید ظاہر کی ہے کہ وہ اپنے لیڈر اور ہم وطنوں کی توقعات پر پورا اتر سکیں گی۔

خدیجہ شاہ نے اعلان کیا ہے کہ جب تک میری دہری شہریت کا مسئلہ حل نہیں ہو جاتا میں نے مہرالنساء سجاد کو اپنی نمائندگی کے لیے نامزد کیا ہے۔

انہوں نے کہا کہ مہرالنساء نہ تو میرے خاندان سے تعلق رکھتی ہیں اور نہ ہی وہ میری دوست ہیں لیکن میں نے انہیں بہت غور و فکر کے بعد منتخب کیا ہے۔

مزید پڑھیں: خدیجہ شاہ کا جیل سے خط، گرفتار پی ٹی آئی خواتین کی حالتِ زار بیان کردی

خدیجہ شاہ نے اپنی اس پوسٹ کے اختتام پر کہا کہ انہیں فخر ہے کہ وہ ایک غیر معمولی نوجوان پاکستانی خاتون کو پی ٹی آئی اور پارلیمنٹ میں اپنی نمائندگی کے لیے نامزد کر رہی ہیں جو ان کی طرح عوام کی خدمت کے لیے پرجوش ہیں۔

خدیجہ شاہ نے مزید کہا کہ ’ہم مل کر اپنے ملک اور پارٹی کے لیے بامعنی کام کرنے کے لیے پرعزم ہیں انشاء اللّٰہ۔‘