وزیر داخلہ کی سعودی سفیر سے ملاقات، پاک-بھارت کشیدگی میں موثر کردار پر اظہار تشکر

?️ 30 اگست 2025

اسلام آباد: (سچ خبریں) وفاقی وزیر داخلہ محسن نقوی نے کہا ہے کہ سعودی عرب کی حکومت اور سعودی سفیر نواف بن سعید احمد المالکی نے پاکستان اور ہندوستان کے حالیہ تناؤ کے دوران مخلصانہ، برادرانہ اور موثر کردار ادا کیا،سعودی عرب جنگ اور امن میں ہمیشہ پاکستان کے ساتھ کھڑا ہے ۔ وزارت داخلہ کے مطابق وفاقی وزیر داخلہ محسن نقوی نے ہفتہ کو اسلام آباد کے ڈپلومیٹک انکلیو میں سعودی عرب کے سفارت خانے کا دورہ کیا ۔

وفاقی وزیر داخلہ کی آمد پر سعودی سفیر نواف بن سعید احمد المالکی نے وفاقی وزیر پرتپاک استقبال کیا۔ملاقات کے دوران وفاقی وزیر داخلہ محسن نقوی نے حالیہ پاک بھارت تنازعہ میں سعودی عرب کی حکومت اور سفیر کے مخلصانہ، برادرانہ اور موثر کردار ادا کرنے پر اظہار تشکر کیا۔

وفاقی وزیر داخلہ محسن نقوی نے کہا کہ سعودی عرب ہمیشہ پاکستان کے ساتھ کھڑا ہے چاہے وہ جنگ ہو یا امن، سعودی عرب نے ہمیشہ دو طرفہ تعلقات کے تحت ہر آزمائش میں پاکستان کا ساتھ دیا ہے۔

وفاقی وزیر داخلہ محسن نقوی نے سعودی سفیر کو بیرون ملک بالخصوص سعودی عرب میں بھیک مانگنے میں ملوث منظم گروہوں کے خلاف پاکستان کے جاری کریک ڈاؤن کے بارے میں بھی آگاہ کیا۔

وفاقی وزیر داخلہ محسن نقوی نے اس بات کی تصدیق کی کہ پاکستان کے تشخص اور مملکت میں کام کرنے والے شہریوں کے تحفظ کے لیے "بھیک مانگنے والے مافیا” کے خلاف زیرو ٹالرنس کی پالیسی اپنائی گئی ہے۔سعودی سفیر نواف بن سعید احمد المالکی نے وزیر داخلہ کی کاوشوں کو سراہتے ہوئے کہا کہ سعودی عرب پاکستان کو ایک برادر اور دوست ملک سمجھتا ہے۔ انہوں نے اس بات پر زور دیا کہ ریاض اسلام آباد کے ساتھ اپنے تعلقات کو سب سے زیادہ اہمیت دیتا ہے اور متعدد شعبوں میں تعاون کو مزید مضبوط بنانے کا خواہاں ہے۔