سچ خبریں: وزیراعظم شہباز شریف کی زیرصدارت وفاقی کابینہ کا اجلاس منعقد ہوا جس میں اہم امور پر غور کیا گیا،اس اجلاس میں پی ٹی آئی پر پابندی کا معاملہ بھی زیر غور آنا تھا، تاہم اس پر کوئی بحث نہیں ہوئی۔
ذرائع کے مطابق، کابینہ نے دوست ممالک کے کاروباری افراد اور شہریوں کو ویزا فری انٹری کی منظوری دے دی ہے۔ وزارت داخلہ کی سمری پر 126 ممالک کے باشندوں کو ویزا فری انٹری کی اجازت دی گئی ہے اور ان ممالک کے لیے ڈیجیٹل ویزا جاری کرنے کی بھی منظوری دی گئی ہے۔
یہ بھی پڑھیں: وفاقی کابینہ کا اجلاس
اجلاس میں، ایس ای سی پی ایکٹ 1997 کے تحت خصوصی عدالتوں کے قیام، نجکاری کمیشن کے بورڈ کے اراکین کی تعداد میں اضافے، اور متروکہ وقف املاک بورڈ کے چیئرمین کی تعیناتی کی منظوری دی گئی۔ کابینہ نے پاکستان اور ڈنمارک کے درمیان ایم او یو پر دستخط کی بھی منظوری دی۔
ذرائع کا کہنا ہے کہ وفاق کی 2021-22 اور 2022-23 کے لیے پالیسیوں پر عملدرآمد کی رپورٹ بھی کابینہ میں پیش کی گئی۔
ذرائع کے مطابق، کابینہ میں پی ٹی آئی پر پابندی کا معاملہ زیر غور آنا تھا، تاہم اس پر کوئی بحث نہیں ہوئی۔ اسی طرح، سابق صدر عارف علوی، عمران خان، اور قاسم سوری پر آرٹیکل 6 لگانے کا معاملہ بھی زیر غور نہیں آیا۔
مزید پڑھیں: وفاقی کابینہ کا اجلاس طلب؛ وجہ؟
واضح رہے کہ وفاقی وزیر اطلاعات عطا تارڑ نے کہا تھا کہ حکومت نے تحریک انصاف پر پابندی لگانے کا فیصلہ کیا ہے اور اس حوالے سے پیپلزپارٹی سے مشاورت بھی کی گئی ہے۔ پی ٹی آئی پر پابندی کی منظوری کابینہ دے گی۔
