اسماعیل ہنیہ کی شہادت کا جماعتِ اسلامی کے دھرنے پر اثر

?️ 31 جولائی 2024

سچ خبریں: جماعت اسلامی کراچی نے اسماعیل ہنیہ کی شہادت کے باعث آج شام گورنر ہاؤس سندھ پر دیے جانے والے دھرنے کو مؤخر کر دیا ہے۔

جماعت اسلامی کراچی کے سکریٹری جنرل توفیق الدین صدیقی کے مطابق یہ فیصلہ اسماعیل ہنیہ کی شہادت کے باعث کیا گیا ہے۔

توفیق الدین صدیقی نے کہا ہے کہ اسماعیل ہنیہ کی غائبانہ نماز جنازہ آج شام پانچ بجے نیو ایم اے جناح روڈ پر ادا کی جائے گی۔

یہ بھی پڑھیں: حماس کے سیاسی سربراہ اسماعیل ہنیہ کی شہادت پر مولانا فضل الرحمٰن کا بیان

یاد رہے کہ اس سے قبل جماعت اسلامی کے ترجمان نے کہا تھا کہ دھرنا گیس و بجلی کے بلوں میں اضافے، پیٹرول کی بڑھتی قیمتوں اور ٹیکسز کے خلاف دیا جانا تھا۔

دوسری جانب، ٹریفک پولیس نے جماعت اسلامی کراچی کے دھرنے کے اعلان کے پیش نظر کہا تھا کہ ایوان صدر روڈ دوپہر 3 بجے سے فوارہ چوک سے گورنر ہاؤس گیٹ نمبر ایک تک ٹریفک کے لیے بند رہے گا، جبکہ شاہین کمپلیکس سے پی آئی ڈی سی آنے اور جانے والی سڑکیں کھلی رہیں گی۔

ٹریفک پولیس کا کہنا تھا کہ میٹرو پول سے آنے والے ٹریفک کو ضیا الدین روڈ پر جانے کی اجازت نہیں ہوگی اور آرٹس کونسل چورنگی سے ٹریفک کو کلب روڈ کی طرف موڑ دیا جائے گا۔

مزید پڑھیں: اسماعیل ہنیہ کے خاندان کی شہادت پر مشہور شخصیات اور رہنماؤں کا مسلسل ردعمل

انہوں نے مزید کہا کہ جناح برج سے پی آئی ڈی سی کی طرف ٹریفک کا دباؤ ہوگا۔

جماعت اسلامی کے دھرنے کے اعلان کے پیش نظر ٹریفک پولیس نے شہریوں کو ہدایت کی تھی کہ سلطان آباد ٹریفک سیکشن کٹ سے مائی کولاچی اور بوٹ بیسن کا راستہ اختیار کریں۔