7کروڑ افراد کو کورونا ویکسین کی پہلی ڈوز لگائی جا چکی ہے

?️ 15 ستمبر 2021

اسلام آباد (سچ خبریں) ملک بھر میں ویکسینیشن کا سلسلہ جاری ہے اب تک پاکستان میں 7کروڑ افراد کو کورونا ویکسین کی پہلی ڈوز لگائی جا چکی ہے، گزشتہ روز ملک میں8 لاکھ 90 ہزار 980 افراد کو ڈوز لگائی گئی۔عیدیداروں کا کہنا ہے کہ کورونا کی چوتھی لہر میں کمی آنا شروع ہو گئی ہے۔

تفصیلات کے مطابق ملک بھر میں کورونا ویکسین لگانے کا عمل جاری ہے ، نیشنل کمانڈ اینڈ آپریشن سینٹر نے سماجی رابطے کی ویب سائٹ ٹوئٹر پر اپنے پیغام میں کہا کہ پاکستان میں پہلی ڈوزلگوانےوالےافرادکی تعداد 7کروڑ ہو گئی ، گزشتہ روزملک میں8 لاکھ 90 ہزار 980 افراد کو ڈوز لگائی گئی ، اب تک7 کروڑ 4 لاکھ 2 ہزار 987 ویکسین کی خوراکیں لگائی جا چکی ہے۔

یاد رہے پاکستان میں کورونا کی چوتھی لہر میں کمی آنا شروع ہوگئی ہے ، ملک میں گزشتہ 24 گھنٹوں کے دوران مزید 73افراد انتقال کر گئے اور 2714 نئے کیسز رپورٹ ہوئے۔گزشتہ 24 گھنٹوں کے دوران ملک میں کورونا کے مثبت کیسز کی شرح 5 فیصد سے نیجے آگئی اور 4.78 فیصد رہی جب کہ مجموعی اموات کی تعداد 26 ہزار 938 اور مجموعی کیسز کی تعداد 12 لاکھ 12 ہزار 809 ہوگئی ہے۔

واضح رہے کہ سندھ میں کورونا وائرس کے مریضوں کی تعداد دیگر صوبوں سے زیادہ 4 لاکھ 46 ہزار 840 ہو چکی ہے، جبکہ اس سے کُل اموات 7 ہزار 192 ہو گئیں۔پنجاب میں کورونا وائرس کے اب تک 4 لاکھ 16 ہزار 901 مریض رپورٹ ہوئے ہیں، جبکہ یہاں کُل ہلاکتیں دیگر صوبوں سے زیادہ ہیں جو 12 ہزار 291 ہو چکی ہیں۔خیبر پختون خوا میں کورونا وائرس کے مریضوں کی تعداد 1 لاکھ 69 ہزار 429 ہو چکی ہے، جبکہ اس سے یہاں کُل اموات 5 ہزار 310 ہو گئیں۔