ہمیں چپ رہنے کیلئے بہت سارے لوگوں نے رابطے کئے،علیمہ خان

🗓️ 12 مارچ 2024

لاہور: (سچ خبریں) بانی پی ٹی آئی عمران خان کی بہن علیمہ خان کا کہنا ہے کہ ہمیں چپ رہنے کیلئے بہت سارے لوگوں نے رابطے کئے ہیں، ڈیل کا مطلب کیا ہے؟ ڈیل کا مطلب ہے چپ رہیں،عمران خان کو جیل سے نکال دیں گے آپ بس چپ رہیں۔

انسداد دہشتگردی لاہور کی عدالت میں پیشی کے بعد میڈیا سے گفتگو کرتے ہوئے انہوںنے کہا کہ 9 مئی جناح ہاؤس حملہ کیس پر سماعت ہوئی اور ہم اس کیس کیلئے آئے ہیں لیکن یہاں تو جج ہی نہیں ہے، کبھی تفتیشی افسر نہیں آتا تو کبھی جج نہیں آتے، لوگوں کو 9ماہ سے تنگ کیا جا رہا ہے۔

تفتیش ہی مکمل نہیں ہو رہی۔ایف آئی اے اسلام آباد نے بھی طلب کر رکھا ہے۔علیمہ خان کامزید کہنا تھا کہ انہوں نے کہا کہ ہم 800 دہشت گرد اگلی بار میڈیا اور مریم نواز کو ساتھ لے کر جائیں گے، ہم پر ن لیگ کا آفس جلانے کا مقدمہ درج کیا گیا، ہم ماڈل ٹاوٴن اور کلمہ چوک جائیں گے، آپ اور ہم پیدل یہ سفر کریں گے اور تفتیشی کو ساتھ لے کر جائیں گے، ہم ماڈل ٹاوٴن ن لیگ کے دفتر اور اس کے بعد پھر ہم کلمہ چوک اور پھر ہم کور کمانڈر کے گھر جائیں گے، ہم چیف منسٹر اور تفتیشی افسر کو تفتیش کر کے دکھائیں گے۔

حالیہ الیکشن میں عوام کا مینڈیٹ چوری کیا گیا ہے، لوگ اب غربت کی لائن سے نیچے چلے جائیں گے۔عمران خان کی صحت کے بارے میں گفتگو کرتے ہوئے انہوں نے کہا کہ بانی پی ٹی آئی اور بشریٰ بی بی ٹھیک ہیں، بانی پی ٹی آئی کی آنت میں تکلیف تھی سپرنٹنڈنٹ کو ہمیں بتانا چاہیے تھا تاکہ ہم اپنے ڈاکٹر کا بندوبست کریں، سپرنٹنڈنٹ کہتا ہے ہمیں اوپر سے اجازت لینا پڑتی ہے۔ہر پیشی پر کوئی نہ کوئی بہانہ بنایا جاتا ہے ۔یہ کیس کو ختم ہی نہیں کرنا چاہتے اسے لٹکا کر رکھنا چاہتے ہیں اسی لئے ہر پیشی کبھی تفتیشی افسر نہیں آتا تو کبھی جج صاحب چھٹی پر چلے جاتے ہیں۔