اسلام آباد: (سچ خبریں) ملک میں قلیل مدتی مہنگائی میں کمی کے باوجود 13 اشیائے ضروریہ کی قیمتوں میں اضافہ ہوا جبکہ ہفتہ وار مہنگائی میں 0.22 فیصد کی کمی کے بعد مجموعی سالانہ شرح 15.15 فیصد ہوگئی۔
ڈان نیوز کی رپورٹ کے مطابق وفاقی ادارہ شماریات نے مہنگائی سے متعلق ہفتہ وار رپورٹ جاری کردی۔
حساس قیمت انڈیکس سے پیمائش کردہ مہنگائی کے مطابق ایک ہفتے میں 13 اشیائے ضروریہ کی قیمتوں میں اضافہ ہوا اور 10 اشیا سستی ہوئیں جبکہ 28 کی قیمتیں مستحکم رہیں۔
رپورٹ کے مطابق ایک ہفتے میں آلو 3. 33 فیصد مہنگے ہوئے، لہسن 2.97 اور دال مونگ 2. 84 فیصد مہنگی ہوئی۔
اس کے علاوہ انڈے 0.22، کیلے 0.75 اور ٹماٹر 0. 48 فیصد مہنگے ہوئے۔
رپورٹ کے مطابق گھی 0.36، جلانے والی لکڑی 0. 29 اور سگریٹ 0. 08 فیصد مہنگے ہوئے۔
رپورٹ میں کہا گیا کہ حالیہ ہفتے کے دوران چکن 7.12 اور پیاز 0.55 فیصد سستی ہوئی۔
یاد رہے کہ 3 روز قبل عالمی مالیاتی فنڈ (آئی ایم ایف) نے ورلڈ اکنامک آؤٹ لک رپورٹ 2024 جاری کی تھی جس میں پاکستان میں مہنگائی اور بے روزگاری میں کمی کی پیش گوئی کی گئی تھی۔
آئی ایم ایف کی جاری کردہ ورلڈ اکنامک آؤٹ لک رپورٹ 2024 کے مطابق رواں مالی سال کے لیے مقرر کردہ معاشی شرح نمو کا ہدف حاصل نہ ہونے کا خدشہ ہے۔
رپورٹ میں بتایاگیا کہ رواں مالی سال پاکستان میں مہنگائی مقررہ ہدف سے بھی کم رہنے کا امکان ہے۔
اس کے علاوہ رپوٹ کے مطابق گزشتہ مالی سال کے مقابلے پاکستان میں کرنٹ اکاؤنٹ خسارہ بڑھنےکا خدشہ ہے۔
آئی ایم ایف ورلڈ اکنامک آؤٹ لک رپورٹ 2024 کے مطابق رواں مالی سال پاکستان کی معاشی شرح نمو تین اعشاریہ دو فیصد رہنےکی توقع ہے۔
