کوئٹہ دھماکا:وزیر اعظم نے  واقعے کی شدید مذمت کرتے ہوئے رپورٹ طلب کرلی

?️ 22 اپریل 2021

کوئٹہ (سچ خبریں) وزیراعظم عمران خان نے کوئٹہ دھماکے کے واقعے کی شدید الفاظ میں مذمت کی ، انہوں نے نوٹس لیتے ہوئے واقعے کی رپورٹ طلب کرلی، وزیراعظم رات گئے تک معاملات کی خود نگرانی کرتے رہے اور وزیر داخلہ کو ہر پہلو سے تفتیش کرنے کا حکم دیا، اور معاملے کی تہہ تک پہنچنے کی ہدایت جاری کی۔

تفصیلات کے مطابق گزشتہ رات کوئٹہ سرینا چوک پر واقع ہوٹل کی پارکنگ میں دھماکے کے نتیجے میں 5 افراد جاں بحق ہوئے، وزیراعظم نے واقعے کی تحقیقات کے لیے وزیر داخلہ کو ہدایت جاری کردی ہیں اور کہا ہے کہ اس معاملے کی تہہ تک پہنچا جائے۔

واضح رہے کہ کوئٹہ بم دھماکے کا ایک اور زخمی جاں بحق ہوگیاہے جس کے بعد ہلاکتوں کی تعداد 5 ہوگئی جبکہ 10 افراد اب بھی زخمی ہیں جن میں کئی کی حالت تشویشناک بتائی جارہی ہے۔ ہسپتال ذرائع نے ہلاکتوں اضافے کا خدشہ ظاہر کرتے ہوئے بتایا ہے کہ دھماکے میں جاں بحق افراد کی شناخت نصیب ، پولیس اہلکار شجاعت عباسی، ہوٹل سیکورٹی گارڈ اسد ، شفٹ منیجر شاہ زیب اور محکمہ جنگلات کا ملازم ایمل کاسی شامل ہیں جبکہ زخمیوں میں دو اسسٹنٹ کمشنر بھی شامل ہیں۔

پولیس کا کہنا ہے کہ دھماکا خیز مواد ایک گاڑی میں نصب کیا گیا تھا، دھماکے سے ہوٹل کی پارکنگ میں کھڑی متعدد گاڑیاں تباہ ہوگئیں وزیراعلیٰ جام کمال خان نے مقامی ہوٹل کی پارکنگ میں بم دھماکے کی مذمت کرتے ہوئے رپورٹ طلب کرلی ہے۔

وفاقی وزیر داخلہ شیخ رشید کا کہنا ہے کہ یہ کوئٹہ کا ایک محفوظ ترین علاقہ ہے، غیر ملکی بھی اسی ہوٹل میں ٹھہرتے ہیں ایک گاڑی کس طرح ہوٹل کی پارکنگ میں داخل ہوئی، سیکورٹی کی کسی قسم کی بریچ ہوئی تب ہی گاڑی اندر پہنچی دھماکا خیز مواد گاڑی میں موجود تھا‘وفاقی وزیر اطلاعات فواد چودھری نے کہا کہ دہشت گردی سے بلوچستان کی ترقی روکنے کی کوشش کرنے والوں کو شکست ہو گی۔